ԵՎՐՈՊԱՅԻ ԱՌԱՋՆՈՒԹՅՈՒՆՈՒՄ ԱՌԱՎԵԼ ՀԱՋՈՂ Է ԽԱՂՈՒՄ ԿԱՐԵՆ
ԱՍՐՅԱՆԸ
27-06-2005 19:16:00 | Հայաստան | Սպորտ
ԵՐԵՎԱՆ, 27 ՀՈՒՆԻՍԻ, ՆՈՅՅԱՆ ՏԱՊԱՆ: Վարշավայում ընթացող
շախմատի Եվրոպայի տղամարդկանց անհատական առաջնությունում Հայաստանի
9 ներկայացուցիչներից առավել հաջող է հանդես գալիս Կարեն Ասրյանը:
Անցկացված 8 տուրերում Ասրյանը վաստակել է 6 միավոր եւ 6
մասնակիցների հետ բաժանում է 3-9-րդ տեղերը: Իսկ առջեւում են
Սերգեյ Կարյակինը (Ուկրաինա) 7 եւ Դիտեր-Լիվիու Նիսիպիանուն
(Ռումինիա) 6,5 միավորով: Հայաստանցի շախմատիստներից Լեւոն
Արոնյանը եւ Գաբրիել Սարգսյանը նույնպես բարձր տեղեր են
զբաղեցնում: Արոնյանը 5,5 միավորով բաժանում է 10-26-րդ, իսկ
Սարգսյանը 5 միավորով` 27-60-րդ տեղերը: Ընդ որում, եւ Լեւոնը, եւ
Գաբրիելը հանդես են գալիս առանց պարտության: Հայաստանցի մյուս
շախմատիստները տեղեր են զբաղեցնում աղյուսակի միջին մասերում:
Եվրոպայի առաջնության ավարտին մնացել է 5 տուր: Չեմպիոնն ու
մյուս մրցանակակիրները հայտնի կդառնան հուլիսի 3-ին: