ՓԵՏՐՎԱՐԻ 5-ԻՆ ԵՐԵՎԱՆՈՒՄ ՄԻԱՅՆ ՄԵԿ ՀԱՄԵՐԳՈՎ ՀԱՆԴԵՍ ԿԳԱ
ԱՇԽԱՐՀԱՀՌՉԱԿ ԲԱՐԻՏՈՆ ՌԵՆԱՏՈ ԲՐՈՒԶՈՆԸ
26-01-2005 19:35:00 | Հայաստան | Մշակույթ
ԵՐԵՎԱՆ, 26 ՀՈՒՆՎԱՐԻ, ՆՈՅՅԱՆ ՏԱՊԱՆ: Երեւանի «Արամ Խաչատրյան»
համերգասրահում միայն մեկ համերգով` փետրվարի 5-ին, հանդես կգա
աշխարհահռչակ բարիտոն Ռենատո Բրուզոնը: Առաջին անգամ Հայաստան
ժամանող հանրահայտ երգչի երեւանյան համերգը նախաձեռնել է Հայաստանի
Պետական ֆիլհարմոնիկ նվագախմբի (ՀՊՖՆ) գլխավոր դիրիժոր Էդուարդ
Թոփչյանը: Ինչպես «ՆՈՅՅԱՆ ՏԱՊԱՆ»-ի թղթակցին հայտնեց նվագախմբի
փոխտնօրեն Դավիթ Թերզյանը, Բրուզոյի հետ բանակցությունները սկսվել
են դեռեւս նախորդ տարվանից, սակայն պայմանավորվածությունը միայն
վերջերս է ձեռք բերվել:
Համերգին կհնչեն Ջուզեպե Վերդիի օպերաներից արիաներ եւ
նախերգանքներ: Դ. Թերզյանի խոսքերով, համերգի տոմսերի արժեքը
կկազմի 3-10 հազար դրամ (6-20 ԱՄՆ դոլար): «Մենք բոլոր պայմանները
ստեղծել ենք, որպեսզի հայ հանդիսատեսը հնարավորություն ունենա
ունկնդրելու աշխարհահռչակ բարիտոնին»,- նշեց նա:
Հայաստանի Պետական ֆիլհարմոնիկ նվագախումբը նախատեսում է
կազմակերպել նաեւ աշխարհահռչակ տենոր Պլասիդո Դոմինգոյի համերգը
Երեւանում` նվիրված Հայոց մեծ եղեռնի 90-ամյակին: Արդեն մի քանի
ամիս է, ինչ Էդուարդ Թոփչյանի եւ հանրահայտ երգչի մենեջերի միջեւ
բանակցություններ են ընթանում:
Ռենատո Բրուզոնը լայն ճանաչման է արժանացել Վերդիի եւ
Դոնիձետիի օպերաների կատարումներով: Նրա առաջին բեմելը կայացել է
1961 թ. Սպոլետոյում` կոմս դը Լունայի դերակատարումով
(«Տրուբադուր»): Բրուզոնը հանդես է եկել աշխարհի գրեթե բոլոր
հեղինակային օպերային բեմերում: Երգիչը հանդիսանում է «Լա Սկալա»
եւ «Մետրոպոլիտեն» թատրոնների մեներգիչը: 2004 թ. Բրուզոնին
շնորհվել է «Վերջին տարիների Սիմոն Բոկանեգրայի լավագույն
դերակատար» տիտղոսը: