ԽԱՉԱՏՈՒՐ ԱԲՈՎՅԱՆԻ ՏՈՒՆ-ԹԱՆԳԱՐԱՆԻ ԳՈՅՈՒԹՅՈՒՆԸ ՎՏԱՆԳՎԱԾ Է
22-11-2004 19:00:00 | Հայաստան | Մշակույթ
ԵՐԵՎԱՆ, 22 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Խաչատուր Աբովյանի
Քանաքեռի տուն-թանգարանի տարածքում հարեւանությամբ ապրող
բնակիչները կառուցել են հավանոց եւ «բեսեդկաներ», ինչպես նաեւ այն
դարձրել ամեն տեսակի «ռազբորկաների» եւ «կերուխումի» վայր: Ինչպես
«ՆՈՅՅԱՆ ՏԱՊԱՆ»-ի թղթակցի հետ զրույցում նշեց թանգարանի տնօրեն
Հովհաննես Զատիկյանը, «ռազբորականերից» մեկի ժամանակ հրազենային
կրակոցից վնասվել է մեծ գրողի արձանը: Բացի այդ, ըստ տնօրենի,
նրանք անօրինական միացումներ կատարելով թանգարանի գծից
էլեկտրաէներգիա են գողանում ձմռանը` ջեռուցման նպատակով, ամռանը`
պահածո փակելու համար:
Այս ամենի արդյունքում զգալիորեն տուժել են Աբովյանի
ընտանիքին պատկանող տոհմատունը, թոնրատունը եւ թանգարանի`
1938թ.-ին բացված, հին շինությունը: Հ.Զատիկյանը նշեց, որ իր
պաշտոնավարության երկու տարիների ընթացքում շինությունը պահապանող
15 պահակ է փոխվել. «Ոչ ոք չի ուզում մի քանի հազար դրամի համար
վտանգել իր կյանքը»:
Հ.Զատիկյանի խոսքերով, շուտափույտ միջոցներ չձեռնարկելու
դեպքում առաջիկա անձրեւաջրերից եւ ձնհալից կտուժեն ոչ միայն
թանգարանի ցուցասրահները, այլ ընդհանրապես վտանգի տակ կդրվի
թանգարանի գոյությունը: Տնօրենի խոսքերով, ինքը բազմաթիվ դիմումներ
է գրել, բազմաթիվ դռներ ծեծել, սակայն ոչ ոք չի արձագանքել: Իսկ
հաջորդ տարի լրանում է մեծ գրողի 200-ամյակը: Ի վերջո Հ.Զատիկյանը
դիմել է ՀՀ վարչապետին: Ըստ տնօրենի, թանգարանի պարիսպների,
դարպասի եւ շենքի վերանորոգման համար անհրաժեշտ է 3,5-4 մլն դրամ:
Հ.Զատիկյանը հայտնեց նաեւ, որ վերջերս Տարտուի (նախկինում`
Դորպատ) համալսարանում փակվել է Աբովյանի անվան սենյակը,
անվանափոխվել է գրողի անվան փողոցը, քանդվել կիսանդրին: «Գուցեեւ
սա հետեւանքն է այն ամենի, ինչ կատարվում է այսօր Աբովյանի
հայրենիքում` անտարբերություն եւ անհաղորդ կեցվածք սեփական
մշակույթի, գրականության ու պատմության նկատմամբ»,- ասաց թանգարանի
տնօրենը: