ԱՎԱՐՏՎԵՑ ՍՏԵՓԱՆ ՍԱՐԳՍՅԱՆԻ ԱՆՎԱՆ ՄԻՋԱԶԳԱՅԻՆ ՄՐՑԱՇԱՐԸ
11-10-2004 20:30:00 | Հայաստան | Սպորտ
ԵՐԵՎԱՆ, 11 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Ավարտվեց ազատ ոճի
ըմբշամարտի միջազգային մրցաշարը` հայ անվանի ըմբիշ, օլիմպիական
փոխչեմպիոն, աշխարհի եռակի գավաթակիր, Եվրոպայի չեմպիոն Ստեփան
Սարգսյանի մրցանակների խաղարկությունը:
2 օր տեւած մրցումներին մասնակցեցին մի շարք երկրների մի քանի
տասնյակ ուժեղագույն ըմբիշներ, որոնց թվում կային օլիմպիական
խաղերի, աշխարհի ու Եվրոպայի չեմպիոններ եւ մրցանակակիրներ:
Մրցաշարն ուժերի կարեւոր ստուգատես եղավ նաեւ Հայաստանի հավաքականի
անդամների համար: Նրանցից 2-ը` Մարտին Բերբերյանը (55 կգ քաշային
կարգ) եւ Արման Ղումաշյանը (60 կգ), առավելության հասնելով իրենց
բոլոր մրցակիցների նկատմամբ, դարձան մրցաշարի հաղթողներ: Մյուս
բոլոր քաշային կարգերում 1-ին տեղեր գրավեցին Ռուսաստանի
ներկայացուցիչները` Իրբեկ Սարնիեւը (74 կգ), Վադիմ Լալիեւը (84
կգ), Թեյմուր Կաստիեւը (96 կգ), Օլեգ Խոդյակովը (120 կգ): Աչքի
ընկած բոլոր ըմբիշները պարգեւատրվեցին գավաթներով եւ դրամական
մրցանակներով: Իսկ Իրբեկ Սարնիեւը, որը հաղթող դարձավ Ստեփան
Սարգսյանի քաշային կարգում, արժանացավ նաեւ հատուկ մրցանակի:
Պարգեւը հանձնեց ինքը` Ստեփան Սարգսյանը:
Ինչպես տեղեկացրին մրցաշարի կազմակերպիչները, ըմբշամարտի
միջազգային ֆեդերացիան (ՖԻԼԱ) Ստեփան Սարգսյանի մրցանակների
խաղարկության մրցումներն ընդգրկել է իր ծրագրում: Այնպես որ`
հաջորդ մրցաշարերն ավելի ներկայացուցչական, կազմ կհավաքեն: