Միջդպրոցային մրցույթ՝ Եվրասիա միջազգային համալսարանում
07-05-2016 10:30:00 | Armenia |
ՀՀ ԿԳ նախարարության և Երևանի քաղաքապետարանի աջակցությամբ 2016թ. մայիսի 7-ին, ժամը 10:30-ին Եվրասիա միջազգային համալսարանում նախատեսվում է անցկացնել միջդպրոցային մրցույթ՝«Ստեղծագործական մտածողություն և նորարարություն» խորագրով: Այն անցկացվում է համալսարանի կողմից տարիներ առաջ մշակված և որպես լրացուցիչ կրթական ծրագիր ՀՀ ԿԳ նախարարության կողմից հաստատված հմտությունների և կարողությունների զարգացման «Քայլ առաջ» ծրագրի առաջին փուլի շրջանակներում: Մրցույթին մասնակցելու իրավունք է ստացել Երևանի 10 հիմնական դպրոցի 70 աշակերտ:
Հմտությունների և կարողությունների զարգացման «Քայլ առաջ» ծրագրի նպատակն է աշակերտների մոտ զարգացնել նոր և լրացուցիչ, հիմնական դպրոցի կրթական ծրագրերում դեռևս չարտահայտված, գործնական հմտություններ: Կրթական ծրագրի այդ լրացումը չափազանց կարևոր է, որովհետև նպաստում է աշակերտի՝ ոչ ստանդարտ, չնախատեսված իրադրություններում գործելու ունակության ձևավորմանը, անհատական զարգացման հետագծի ու մասնագիտական կարիերայի անսխալ կառուցմանը: