Կստորագրվի հուշագիր՝ «Մատչելի բնակարան երիտասարդ մասնագետներին» բնակարանային ապահովության սոցիալական ծրագրի շահառուների վարկավորումն իրականացնելու վերաբերյալ

21-02-2017 11:30:00 | Հայաստան |

Փետրվարի 21-ին ժամը 11:30-ին ՀՀ սպորտի և երիտասարդության հարցերի նախարարության նիստերի դահլիճում (ք. Երևան, Աբովյան 9) ՀՀ Նախագահի բարձր հովանու ներքո իրականացվող բնակարանաշինական ծրագրերի համակարգող Արսեն Քարամյանի և ԱՐԱՐԱՏԲԱՆԿ ԲԲԸ-ի գործադիր տնօրեն-վարչության նախագահ Աշոտ Օսիպյանի միջև կստորագրվի համագործակցության հուշագիր՝ ԵՊՀ շրջանավարտների միավորման կողմից իրականացվող «Մատչելի բնակարան երիտասարդ մասնագետներին» բնակարանային ապահովության սոցիալական ծրագրի շահառուների վարկավորումն իրականացնելու վերաբերյալ:

Նշված ծրագրի շրջանակում Երևան քաղաքի Ավան վարչական շրջանի Ծարավ Աղբյուրի 55/3 հասցեում կառուցվում է ժամանակակից ճարտարապետական լուծումներով բազմաբնակարան-բազմաֆունկցիոնալ շենքային համալիր, որի բնակարանները շուկայականից անհամեմատ ցածր գներով տրամադրվել են երիտասարդ բժիշկներին, մանկավարժներին, դասախոսներին, գիտաշխատողներին, ծրագրավորողներին, բանկային համակարգի աշխատողներին և այլն:

Բնակելի համալիրը բաղկացած է լինելու երեք մասնաշենքերից, ունենալու է 210 բնակարաններ և ստորգետնյա ավտոկայանատեղեր: Շենքի հարակից տարածքն ամբողջությամբ բարեկարգվելու է, նորացվելու են կոմունիկացիոն համակարգերը, կառուցվելու են մանկական խաղահրապարակներ և կանաչապատ հանգստի գոտիներ: Տարածքն ունենալու է ժամանակակից արտաքին լուսավորություն:

Բնակարանաշինական ծրագրի ընդհանուր արժեքը կազմում է 6 մլրդ. ՀՀ դրամ:

Ծրագրի շահառուների վարկավորումն իրականացնելու նպատակով հայտարարված մրցույթին մասնակցել են թվով 9 բանկեր, որոնց կողմից ներկայացված առաջարկներից հաղթող է ճանաչվել ԱՐԱՐԱՏԲԱՆԿ ԲԲԸ-ի վարկավորման հետևյալ առաջարկը.

- հիփոթեքային վարկի արժույթը՝ ՀՀ դրամ,

- հիփոթեքային վարկի մարման ժամկետը՝ մինչև 20 տարի,

- հիփոթեքային վարկի տարեկան տոկոսադրույքը՝ 7,95 տոկոս,

- կանխավճարի չափը՝ 10-20 տոկոս,

- հիփոթեքային վարկ տրամադրելու որոշման կայացման ժամկետը՝ պահանջվող փաստաթղթերը ներկայացնելուց հետո 3 աշխատանքային օրվա ընթացքում,

- հիփոթեքային վարկի վաղաժամկետ մարման դեպքում տույժեր չկան,

- հիփոթեքային վարկի տրամադրման վճարներ չկան,

- կուտակային խնայողական դրամային ավանդների ծառայություններ՝ մինչև կառուցապատման ավարտը ժամկետով, 14 տոկոս տարեկան տոկոսադրույքով:

Կարդացել են 213 անգամ

Noyan Tapan TV