Հայաստանի և Վրաստանի հանրապետությունների վարչապետերի նախնական հանդիպման և պայմանավորվածությունների շրջանակներում Հայաստան է այցելելու գործարար պատվիրակություն՝ էկոնոմիկայի և կայուն զարգացման նախարար Գեորգի Գախարիայի գլխավորությամբ:
Հունիսի 29-ին ժամը 12-ին Երևանի «Հիլթոն» հյուրանոցի «Միլանո» սրահում կկայանա Հայ-վրացական բիզնես ֆորում, որին մասնակցելու են երկու երկրների նախարարներ, առևտրաարդյունաբերական պալատների նախագահներ, պաշտոնատար այլ այրեր, գործարարներ: Լիագումար նիստին, կլոր սեղաններին ու բիթուբի հանդիպումներին քննարկվելու են շինարարությանը, առողջապահությանը, տուրիզմին, ազատ տնտեսական գոտիներին և այլ ոլորտներին վերաբերող հարցեր:
Շնորհանդեսներով կներկայացվեն Հայաստանի և Վրաստանի գործարար և ներդրումային մթնոլորտը:
Հայաստանի և Վրաստանի առևտրաարդյունաբերական պալատների նախագահներ Մարտին Սարգսյանը և Նինո Չիկովանին ստորագրելու են համագործակցության հուշագիր:
ՀՀ առևտրաարդյունաբերական պալատի լրատվական ծառայություն