Հայոց Ցեղասպանութեան ճանաչումը Թուրքիոյ մէջ չի կրնար յանցագործութիւն համարուիլ
27-10-2011 15:11:01 | | Ի՞նչ է գրում սփյուռքի մամուլը
«Նոր Յառաջ»
Հոկտեմբեր 27
Մարդկային Իրաւանց Եւրոպական Ատեանին Հոկտեմբեր 25ին կայացուցած միաձայն վճիռին համաձայն՝ Հայոց Ցեղասպանութեան ճանաչումը Թուրքիոյ մէջ չի կրնար յանցագործութիւն համարուիլ: Ատեանը Թուրքիոյ իշխանութիւնները դատապարտած է թուրք պատմաբան Թանէր Աքչամը հալածելու մեղադրանքով: Դատարանի որոշման մէջ կը նշուի, որ Թուրքիոյ իշխանութիւնները բազմիցս խախտած են Աքչամի խօսքի ազատութեան իրաւունքը` զինք հետապնդելով Թուրքիոյ պատժական օրէնքի թիւ 301 յօդուածի հիման վրայ («Թրքական ինքնութեան վիրաւորում»): Միեւնոյն ժամանակ, Ատեանը մերժած է Թուրքիայէն 860.200 եւրօ հատուցման մասին Աքչամի պահանջը:
Աքչամ Թուրքիոյ իշխանութիւններուն դէմ՝ այդ Ատեանին բողոք ներկայացուցած էր, ուր պնդած էր, որ իշխանութիւնները իր վրայ ճնշում կը բանեցնեն` Հայոց Ցեղասպանութեան հարցը արծարծած ըլլալուն համար: Դատարանը համաձայնած է Աքչամի այն պնդումին հետ, թէ Թուրքիոյ իշխանութիւններու կողմէ պարտադըրւող օրէնքները կը խախտեն խօսքի ազատութիւնը երաշխաւորելու մասին՝ այդ երկրին ստանձնած պարտաւորութիւնները: