ԱԱԽ քարտուղար Արթուր Բաղդասարեանն ընդունել է հայ-հնդկական միջկառավարական յանձնաժողովի նիստին մասնակցելու նպատակով Հայաստանում գտնուող Հնդկաստանի Հանրապետութեան Արտաքին գործերի նախարարութեան` արեւելքի հարցերով քարտուղար Սանջայ Սինգհի գլխաւորած պատուիրակութեանը: Ողջունելով հիւրերին` ԱԱԽ քարտուղար Արթուր Բաղդասարեանը նշել է, որ հայ-հնդկական բարիդրացիական յարաբերութիւններն ունեն պատմական անցեալ եւ կարեւորել է այդ յարաբերութիւնները գործնական հիմքերի վրայ դնելու անհրաժեշտութիւնը: աախ քարտուղարը փաստել է, որ այսօր արդէն իսկ առկայ է քաղաքական եւ տնտեսական համագործակցութեան բաւականին բարձր մակարդակ եւ ընդգծել, որ Հայաստանի եւ Հնդկաստանի միջեւ բարեկամական յարաբերութիւնները, ինչպէս նաեւ քաղաքական տարաձայնութիւնների բացակայութիւնը եւ միջազգային կառոյցների շրջանակներում դիրքորոշումների եւ տեսակէտների ներդաշնակութիւնը մեծապէս նպաստում են երկու երկրների միջեւ փոխշահաւէտ համագործակցութեանը: ԱԱԽ քարտուղարը գոհունակութեամբ արձանագրել է, որ Հնդկաստան կատարած իր այցի շրջանակներում Հնդկաստանի Ազգային անվտանգութեան քարտուղար պարոն Շիւշանքար Մենոնի հետ հանդիպումը եւ առ այսօր շարունակուող պարբերական երկխօսութիւնը նոր թափ հաղորդեց անվտանգութեան ոլորտում հայ-հնդկական համագործակցութեանը: Կողմերը նշել են, որ Հնդկաստանում ձեռք բերուած բոլոր պայմանաւորուածութիւններն այսօր յաջողութեամբ կենսագործւում են: Կողմերն իրենց գոհունակութիւնն են յայտնել երկու երկրների միջեւ սերտ փոխգործակցութեան կապակցութեամբ` նշելով, որ յետագայ համագործակցութեան հետաքրքիր սխեմաներ կան նաեւ ռազմական արդիւնաբերութեան ոլորտում: Քննարկուել է բանակցութիւնների փուլում գտնուող խոշորածաւալ ապրանքային վարկի ստացման գործընթացը եւ հնդկական արտադրութեան գիւղատնտեսական տեխնիկայի կիրառումը Հայաստանում, ինչը նաեւ ենթադրում է երկարաժամկէտ համագործակցութեան հնարաւորութիւն` որպէս հեռահար նպատակ արտադրատեխնիկական կայանների ստեղծման եւ գործարկման առումով: Կարեւորուել է հայ-հնդկական գործարար խորհրդի ստեղծումը տնտեսական յարաբերութիւնները որակապես նոր փուլ տեղափոխելու գործում, ինչպէս նաեւ տեղեկատուական տեխնոլոգիաների ոլորտում համագործակցութեան առկայ մեծ ներուժի իրացման նպատակով Երեւանում հայ-հնդկական տեղեկատուական կենտրոնի հիմնումը: Սանջայ Սինգհը բարձր է գնահատել երկու երկրների` դարաւոր պատմութիւն ունեցող ջերմ յարաբերութիւնները եւ շեշտել, որ Հնդկաստանը նոյնպէս պատրաստ է խթանել առկայ համագործակցութիւնը եւ փոխգործակցութեան նոր ուղիներ նախանշել երկկողմ հետաքրքրութիւն ներկայացնող այլ ոլորտներում:

---