Եւրոպական խորհրդարանի եւ հայաստանի ազգային ժողովի խորհրդարանականների միջեւ քաղաքական երկխօսութեան նպատակով տասներկու տարի առաջ հիմուած յանձնաժողովն իր հետեւողական աշխատանքի շնորհիւ կարողացաւ նպաստել Հայաստանի եւ Եւրամիութեան համատեղ օրակարգի ձեւաւորմանը: այս մասին հայաստան-եւրամիութիւն խորհրդարանական համագործակցութեան յանձնաժողովի 12-րդ նիստի բացմանը նոյեմբերի 2-ին յայտարարեց Հայաստանի Ազգային ժողովի նախագահ Յովիկ Աբրահամեանը: Հայաստանի օրէնսդիր մարմնի ղեկավարն ընդգծեց, որ եւրոպական ուղղութիւնը եւ Եւրամիութեան հետ մերձեցումը հայաստանի արտաքին եւ ներքին քաղաքականութեան առաջնահերթութիւններից է: «Ուստի մենք մեծ կարեւորութիւն ենք տալիս Եւրամիութիւն-հայաստան համագործակցութեան օրակարգում այս փուլում ընդգրկուած հարցերին, որոնք վերաբերում էն աւելի սերտ համագործակցութեանը, մասնաւորապէս արտաքին եւ անվտանգութեան քաղաքականութեանը, ժողովրդավարութեան, տնտեսական ինտէգրման, տեղաշարժի, մարդու իրաւունքների, էներգետիկայի բնագաւառներին»,- ասաց նա: Հ.Աբրահամեանը այդ համատեքստում կարեւոր համարեց, որ մօտ մէկ տարի առաջ մեկնարկած եւրամիութիւն-հայաստան ասոցացման համաձայնագրի կնքմանն ուղղուած բանակցութիւնների արդիւնքում յաջողութեամբ աւարտուել է փաստաթղթի տասնինը բաժնի մշակումը: Եւրամերձեցման ճանապարհին Հայաստանի բարեփոխումների եւ առաջընթաց քայլերի շարքում ՀՀ ԱԺ նախագահը կարեւորեց բոլորովին վերջերս լայն քննարկումների արդիւնքում ընդունուած նոր Ընտրական օրէնսգիրքը, որը հնարաւորութիւն է տալիս անցկացնել ազատ եւ արդար ընտրութիւններ: կարեւոր ձեռքբերում է նաեւ, ըստ նրա, «Հաւաքների ազատութեան մասին» նոր օրէնքը, որի նպատակը Հայաստանի Հանրապետութեան Սահմանադրութեան 29-րդ յօդուածով եւ միջազգային պայմանագրերով սահմանուած հաւաքների ազատութեան, հաւաք կազմակերպելու եւ հաւաքին մասնակցելու իրաւունքի ապահովումն է: Նոր օրէնքը նախատեսում է անհրաժեշտ մեխանիզմներ, որոնք կարգաւորում են հաւաքների ազատութիւնն իրականացնելու եւ պաշտպանելու պայմանները եւ կարգը: Նուազագոյնի է հասցւում տարբեր պետական մարմինների միջամտութիւնը հաւաքների սահամանփակման հարցում, /այսպիսով բացառելով հաւաքներն արգելելուն ուղղուած կամայականութիւնները/: Հայաստանի խորհրդարանի ղեկավարը գոհունակութիւն յայտնեց Արեւելեան գործընկերութեան խորհրդարանական վեհաժողովի` «Եվրանեսթ»-ի ստեղծման փաստի առնչութեամբ. «Հայաստանի Ազգային ժողովը առաջիններից է արձագանքել վեհաժողովի ստեղծմանը` առանց յապաղելու տանելով դրա կայացման համար անհրաժեշտ նախապատրաստական աշխատանքները: Միջխորհրդարանական այս վեհաժողովն Արեւելեան գործընկերութեան քաղաքականութեան խորհրդարանական այն լծակն է, որը պէտք է անհրաժեշտ պայմաններ ստեղծի առաջ մղելու քաղաքական ասոցացումը եւ տնտեսական ինտէգրումը Եւրամիութեան եւ Արեւելեան գործընկեր պետութիւնների միջեւ»,- ասաց Յովիկ Աբրահամեանը, յաւելելով, որ վեհաժողովը չի կարող լիարժէք գործել, եթէ տարածաշրջանային համագործակցութեան զարգացմանն ուղղուած հարցերի փոխարէն շարունակաբար հարթակ բերուէն միայն հակամարտութիւններին առնչուող խնդիրներ: «Եւրամիութիւնը` իր տարածքում հաստատելով տեւական խաղաղութիւն եւ բարեկեցութիւն, աշխարհին ներկայանում է որպէս քաղաքական եւ տնտեսական ինտէգրացիայի իւրատեսակ օրինակ: Համոզուած եմ` այս փորձը կարելի կը լինի տեղայնացնել նաեւ Հարաւային Կովկասում, եթէ մասնակից բոլո՛ր կողմերը դրսեւօրէն անհրաժեշտ քաղաքական կամք: Հայաստանի Հանրապետութիւնը իր հարեւանների հետ յարաբերութիւնների բնականոն զարգացման, տարածաշրջանային համագործակցութեան խորացման անթաքոյց կողմնակիցն է»,- ասաց ԱԺ նախագահը:

---