Վարչապետ Տիգրան Սարգսեանը նոյեմբերի 7-ին կառավարութիւնում ընդունել է Հնդկաստանի կապի եւ տեղեկատուական տեխնոլոգիաների պետնախարար Սաչին Պիլոտի գլխաւորած պատուիրակութեանը: Ողջունելով հիւրերին` վարչապետը նշել է, որ Հայաստանի կառավարութիւնը մեծապէս կարեւորում է հայ-հնդկական յարաբերութիւնների զարգացումը, խորացումն ու ընդլայնումը: Նկատելով, որ այժմ հայ-հնդկական տնտեսական համագործակցութիւնը բարձր մակարդակի վրայ է դեղագործութեան, քիմիական արդիւնաբերութեան, մեքենաշինութեան եւ տեղեկաւական տեխնոլոգիաների ոլորտներում, Տիգրան Սարգսեանը նշել է, որ ՀՀ կառավարութիւնը շահագրգռուած է զարգացնել համագործակցութիւնը նաեւ զբօսաշրջութեան ոլորտում, որին մեծապէս կարող է նպաստել երկկողմ աւիաչուերթերի կազմակերպումը: Շնորհակալութիւն յայտնելով ընդունելութեան համար` Սաչին Պիլոտը նշել է, որ երկու երկրների միջեւ պատմական հաարբերութիւնների լաւ հիմքի վրայ պէտք է ստեղծել նոր տնտեսական կապեր, ընդլայնել երկկողմ համագործակցութիւնը տարբեր ուղղութիւններով: Վերջինս հաւաստիացրել է, որ Հնդկաստանի կառավարութիւնը եւս շահագրգռուած է այս հարցում եւ կ'անի ամէն ինչ` տարբեր ուղղութիւններով երկկողմ ծրագրերի իրականացման համար: Հանդիպմանը երկուստէք կարեւորուել է պետութիւնների միջեւ առեւտրաշրջանառութեան զարգացումը եւ այդ գործում մասնաւոր հատուածի ներգրաւումը: Դրանում, վարչապետի խօսքով, մեծ ծաւալի աշխատանք պէտք է իրականացնի հայ-հնդկական միջկառավարական յանձնաժողովը: Ըստ ՀՀ Կառավարութեան տեղեկատուութեան եւ հասարակայնութեան հետ կապերի վարչութեան մամլոյ հաղորդագրութեան, հանդիպմանն անդրադարձ է կատարուել նաեւ գիւղատնտեսութեան, մասնաւորապէս, Հայաստանի` Հնդկաստանից գիւղտեխնիկայի հնարաւոր ձեռքբերմանը, մշակութային եւ գիտակրթական ոլորտներում համագործակցութեանը վերաբերուող հարցերի:

---