ՀՀ կառավարութիւնը դեկտեմբերի 15-ի նիստում հաւանութիւն է տուել ՀՀ արտահանմանն ուղղուած արդիւնաբերական քաղաքականութեան ռազմավարութեանը: ՀՀ էկոնոմիկայի նախարարին յանձնարարուել է մինչեւ 2012թ.-ի յունուարի 31-ը ՀՀ վարչապետի հաստատմանը ներկայացնել վարչապետին կից արդիւնաբերական խորհրդի կազմը եւ աշխատակարգը, նոյն ժամկէտում ապահովել ճշգրիտ ճարտարագիտութեան, դեղագործութեան եւ կոնեակագործութեան ոլորտային խորհուրդների ձեւաւորումը, եռամսեայ ժամկէտում կառավարութեան հաստատմանը ներկայացնել նշուած ոլորտների ռազմավարութեան իրականացումն ապահովող միջոցառումների ցանկը: ըստ ՀՀ կառավարութեան Տեղեկատուութեան եւ հասարակայնութեան հետ կապերի վարչութեան հաղորդագրութեան, վարչապետ Տիգրան Սարգսեանը շնորհակալութիւն է յայտնել այն բոլոր հասարակական կազմակերպութիւններին, հետազօտական կենտրոններին, կուսակցութիւններին, որոնք շահագրգիռ մասնակցութիւն էն ունեցել արդիւնաբերական քաղաքականութեան ռազմավարութեան քննարկմանը եւ իրենց արժէքաւոր առաջարկութիւններով հարստացրել էն փաստաթուղթը: տիգրան Սարգսեանն առաջարկել է, որպէսզի վարչապետին կից ստեղծուելիք խորհրդի կազմը ռոտացիոն սկզբունքով ամէն տարի թարմացուի: « Ընդ որում, ճիշտ կը լինի, եթէ ասոցիացիաների, խոշոր ձեռնարկութիւնների, դոնորների ներկայացուցիչները, փորձագէտները` մասնաւոր հատուածը, աւելի մեծաթիւ լինի, քան պետականը», - ընդգծել է վարչապետը: կառավարութեան հաւանութեանն է արժանացել «Մաքուր արտադրութեան» հայեցակարգը, որը նպաստելու է քիմիական նիւթերի եւ թափօնների անվտանգ կառավարմանը, էկոլոգիապէս մաքուր արտադրութեան ներդրմանը, ինչպէս նաեւ արտադրութեան տնտեսական արդիւնաւէտութեան բարձրացմանը: Նախկինում ընդունուած մէկ այլ որոշման մէջ կատարելով լրացումներ` կառավարութիւնն ակնկալում է հասնել վնասակար նիւթերի արտանետումների նորմաւորման (սահմանափակման) գործընթացի բարելաւմանը:

---