Ապրիլի 25-ին Ճապոնիայում ՀՀ դեսպանութիւնը Տոկիոյի Աքադէմիհիլլզ բիզնես կենտրոնում կազմակերպել էր աշխատաժողով «Չբացայայտած Հայաստան` տնտեսական համագործակցութեան եւ ներդրումների հնարաւորութիւններ» խորագրով: Աշխատաժողովը կայացաւ Ճապոնիայի արտաքին գործերի նախարարութեան, տնտեսութեան, առեւտրի եւ արդիւնաբերութեան նախարարութեան, Ճապոնիայի արտաքին առեւտրի կազմակերպութեան (JETRO), ինչպէս նաեւ Ռուսաստանի եւ նորանկախ պետութիւնների հետ տնտեսական համագործակցութեան կազմակերպութեան (ROTOBO) աջակցութեամբ եւ նուիրուած էր Հայաստանի տնտեսական իրավիճակին, երկրում ձեւաւորուած գործարար մթնոլորտին, գործարարութեան մշակոյթին եւ ՀՀ կառավարութեան կողմից վարուող ներդրումային քաղաքականութեանը: Ճապոնիայի կառավարական կազմակերպութիւններից բացի աշխատաժողովին մասնակցեցին ճապոնական խոշոր 50-ից աւելի ընկերութիւնների, այդ թւում Toyota, Toshiba, Mitsubishi, Kawasaki, Sumitomo, Mizuho, Marubeni, Itochu, Sojitsu-ի ներկայացուցիչներ: Ինչպէս տեղեկացնում են ՀՀ ԱԳՆ մամուլի, տեղեկատուութեան եւ հասարակայնութեան հետ կապի վարչութիւնից, աշխատաժողովին բացման խօսքով հանդէս եկան ROTOBO կազմակերպութեան փոխտնօրէն Ակիրայ Յարութան եւ ՀՀ դեսպանութեան խորհրդատու Հրանտ Պօղոսեանը: Նա առանձին անդրադարձ կատարեց հայ-ճապոնական տնտեսական համագործակցութեան ոլորտում ստեղծուած իրադրութեանը, քննարկեց գործարար կապերն ընդլայնելու, համատեղ ծրագրեր իրականացնելու եւ գործակցութեան հեռանկարային ուղիներ փնտրելու հնարաւորութիւնները: Ելոյթին հետեւեցին քննարկումներն ու կարծիքների փոխանակում:

---