«Ժառանգութիւն» կուսակցութեան առաջնորդ Րաֆֆի Յովհաննիսեանը մայիսի 15-ին հանդէս է եկել հետընտրական Հայաստանի վերաբերեալ յայտարարութեամբ, որով նա նաեւ տեղեկացնում է յունիսի 2-ին «ժառանգութեանէ համագումար հրաւիրելու որոշման մասին: Կուսակցութեան լրատուական ծառայութիւնից յայտնում են, որ հանրութեանը եւ ԶԼՄ-ներին յուզող բոլոր հարցերին Րաֆֆի Յովհաննիսեանը կը պատասխանի համագումարում ու դրանից յետոյ: Նաեւ տեղեկացնում են, որ մամուլի հետ Րաֆֆի Յովհաննիսեանի` այսօր ժամը 12.00-ին նախապէս յայտարարուած հանդիպումը, որի ընթացքում պէտք է ներկայացուէր սոյն յայտարարութիւնը, տեղի չի ունենայ: Ստորեւ այն ներկայացնում ենք Րաֆֆի Յովհաննիսեանի յայտարարութիւնը. «Հայաստանի հանրապետութիւնը եւ նրա քաղաքացիները համակարգային խորը տագնապի մէջ են: Մայիսի 6-ին անցկացուած խորհրդարանական ընտրութիւնները համապետական վիհ առաջացրին, որն աւելի խորն ու վտանգաշատ է, քան երբեւ»: Գործող վարչակարգն աննախադէպ կերպով մեղսակցութեան պաշտամունք պարտադրեց հայ հանրութեան հոծ զանգուածներին եւ, չնայած իր իսկ հնչեցրած ժողովրդավարական հռետորաբանութեանը, ընտրութիւններում բացարձակ քամահրական պահուածք դրսեւորեց քաղաքացիական ազատութիւնների, սահմանադրական իրաւունքի եւ ազգային կամարտայայտութեան անկապտելի սկզբունքի նկատմամբ: Եւս մէկ անգամ հայ ժողովրդին բաժին հասաւ դէ ֆակտոյ խորհրդարան, եւ եթէ մենք միասին ու անյապաղ չգործենք` նրան վերադարձնելու իշխանութիւնը եւ օրէնքի պաշտպանութիւնը, ինչպէս որ յարկն է, Հանրապետութիւնը դատապարտուած է դիմաւորելու նաեւ յաջորդ դէ ֆակտոյ նախագահին` ի թիւս նրանց երկար շարքի: Մենք արժանի ենք եւ կ'ունենանք աւելին: Մենք արժանի ենք եւ պէտք է հասնենք դէ իւրէ ղեկավարութեան` թեբ խորհրդարանում, թեբ նախագահական նստավայրում: «Ժառանգութիւն» կուսակցութիւնը` շարունակելով իր համեստ հասարակական ծառայութեան վաղեմի աւանդոյթը, սպասարկելու է քաղաքացու-ազգի շահերը` թէ ներկայիս դէ ֆակտոյ ամօթի եւ թէ մօտ ապագայի դէ իւրէ արժանապատուութեան պայմաններում: Մենք այսպէս կը գործենք առկայ բոլոր ասպարէզներում, հնարաւոր բոլոր եղանակներով եւ ի հեճուկս հաւանական ամէն տեսակ խոչընդոտների: շնորհակալութիւն ենք յայտնում բոլոր մեր համաքաղաքացիներին, ովքեր իրենց քուէն տուեցին «ժառանգութեան»է` այսպէս թէ այնպէս մաս կազմելով պաշտօնապէս մեր օգտին գրանցուած սակաւ ձայներին, քանզի նրանք ծնունդ են ազատ կամքի, մաքուր խղճի եւ մեր Հայրենիքի ու նրա կոչման հանդէպ խիզախ պատկանելութեան: մեր քաղաքացիական ռահակիցների ու հանրային գործընկերների հետ համալիր քննարկումների աւարտին «ժառանգութիւնը» կը ներկայացնի «Պետութեան վիճակի մասին» իր հանգամանալից գնահատականը եւ կը կիսի ժամանակաւորապէս խաթարուած, բայցեւ տեւապէս սուր ու անխախտ իր տեսլականը Նոր Հայաստանի, որը վստահաբար գալու է: Այս նպատակով «ժառանգութիւնը» յունիսի 2-ին կը հրաւիրի իր համագումարը:

---