Հաշուի առնելով DIY ակումբի շուրջ տեղի ունեցած իրադարձութիւնների վերաբերեալ տարածուած տեղեկատուութիւնը` յարկ եմ համարում հանդէս գալ հետեւեալ յայտարարութեամբ. 1. Դատապարտում եմ ակումբի սեփականատէրերի եւ նրանց աջակիցների կողմից երեւոյթի անհարկի քաղաքականացումը եւ յատկապէս ՀՅԴ անուան շահարկումը: 2. Եթէ ակումբի գործունէութեան մէջ շահագրգիռ անձինք փորձում են այդպիսի գործելակերպով ճանաչում ձեռք բերել եւ իրենց վրայ հրաւիրել հանրութեան ուշադրութիւնը, ապա խորհուրդ կը տամ զերծ մնալ մերկապարանոց յայտարարութիւններից, առաւել եւս երբ իրենց արդէն յաջողուել է ճանաչում ձեռք բերել իրենց աւելի «հարազատ միջավայրումէ: 3. Իբրեւ Ազգային Ժողովի պատգամաւոր բազմիցս եմ նշել, որ Հայաստանում կալանաւորումը` որպէս խափանման միջոց, պէտք է կիրառուի խիստ հազուագիւտ դէպքերում, այլ ոչ թէ դառնա յաճախ կիրառուող պրակտիկա: այս անձնական համոզումս ժամանակին հիմք է հանդիսացել, որ անձնական երաշխաւորութիւնը կամ գրաւը որպէս կալանաւորման այլընտրանքային միջոց կիրառելու նախաձեռնութեամբ հանդէս գամ թէ՜ օրէնսդրական առաջարկների ձեւով, եւ թէ՜ մասնաւոր դէպքերում: 4. Դրական համարելով դատարանի կողմից այլընտրանքային խափանման միջոց կիրառելու որոշումը` յոյս ունեմ, որ հայաստանի իրաւական համակարգը, ինչպէս մինչդատական վարոյթի, այնպէս էլ դատական քննութեան ընթացքում ի զօրու կը լինի երեւոյթին տալ իրաւական ճշմարիտ գնահատական: Ուստի առաջարկում եմ չփորձել աւելորդ ճնշում գործադրել արդարադատութեան համակարգի նկատմամբ: ՀՀ ԱԺ ՊԱՏԳԱՄԱՒՈՐ Արծուիկ Մինասեան P.S. Ի դէպ այս յայտարարութեանը միանում է նաեւ ՀՀ ԱԺ պատգամաւոր Արթուր Աղաբեկեանը:

---