Տարօն Մարգարեան, «Կատարուած աշխատանքների գնահատականը պէտք է տան հէնց բնակիչները»
23-05-2012 17:58:26 | Հայաստան | Տնտեսութիւն
Մայրաքաղաքի բնակչութեանը յուզող խնդիրները պէտք է լինեն օրակարգային
Մայրաքաղաքի ջրամատակարարմանն առնչուող հարցեր են քննարկուել Երեւանի քաղաքապետ Տարօն Մարգարեանի եւ <<Երեւան Ջուր>> ընկերութեան ղեկավարութեան հետ հանդիպման ընթացքում:
Ընդգծելով մայրաքաղաքում ջրամատակարարման որակի կարեւորութիւնը, Երեւանի քաղաքապետը նշել է, որ պէտք է հետեւողական աշխատանք տարուի մայրաքաղաքի ջրամատակարարման ընդհանուր վիճակը բարելաւուելու ուղղութեամբ.
<<Յատկապէս բազմաբնակարան, բազմայարկ շէնքերում այսօր առկայ են ջրամատակարարման գրաֆիկի հետ կապուած խնդիրները եւ պէտք է աշխատենք հասնել այնպիսի արդիւնքի, որ ապահովուի բնակչութեան գոհունակութիւնը: Իրականացուող աշխատանքները նկատելի են, սակայն Երեւանում շուրջօրեայ անխափան ջրամատակարարում ապահովելու հարցում անելիքներ դեռ շատ կան>>,- ընդգծել է Տարօն Մարգարեանը:
Շնորհակալութիւն յայտնելով ջերմ ընդունելութեան համար <<Երեւան Ջուր>> ընկերութեան միջազգային առաքելութիւնների ղեկավար, տնօրէնների խորհրդի անդամ Պիեր Բրիւնեն նշել է, որ շահագործման ոլորտում եւ ներքին ցանցերի արդիականացման հարցում լուրջ ներդրումներ են հարկաւոր եւ ընկերութիւնն այսօր քայլեր է ձեռնարկում այդ նպատակով ֆինանսական միջոցներ ներգրաւելու ուղղութեամբ:
Երեւանի քաղաքապետարանի տեղեկատուութեան եւ հասարակայնութեան հետ կապերի վարչութիւնից յայտնում են, որ քաղաքապետն ընդգծել է, որ մայրաքաղաքի բնակչութեանը յուզող խնդիրները պէտք է լինեն օրակարգային եւ կատարուած աշխատանքների գնահատականը պէտք է տան հէնց բնակիչները: