Երեւան քաղաքի զբօսաշրջութեան զարգացման հիմնական մօտեցումներն ու ծրագրերն են քննարկուել Երեւանի քաղաքապետ Կարէն Կարապետեանի եւ զբօսաշրջային ու այդ ոլորտի շահագրգիռ աւելի քան 90 կազմակերպութիւնների ներկայացուցիչների մայիսի 12-ի հանդիպման ժամանակ: Քաղաքապետն ընդգծել է, որ զբօսաշրջային հնարաւորութիւնների թիրախաւորուած առանձնայատկութիւնները պէտք է մատնանշեն այդ ոլորտում մասնագիտացած մասնաւոր ընկերութիւնները: Կարեւորելով Երեւանի զբօսաշրջութեան զարգացման հրամայականը, ինչպէս նաեւ մայրաքաղաքի զբօսաշրջային միասնական հայեցակարգի մշակման անհրաժեշտութիւնը, Կ.Կարապետեանը նշել է, որ քաղաքապետարանը պատրաստ է փոխգործակցել շահագրգիռ բոլոր կառոյցների հետ. «Երեւանը աշխարհին ներկայանալու լաւ հնարաւորութիւններ ունի, բայց ցաւօք այդ ամէնը շատ վատ է կազմակերպուած: Ըստ էութեան, Երեւան բրենդը ընդհանրապէս ներկայացուած չէ աշխարհում ու դա, կարծում եմ կը համաձայնէք, որ հիմնականում ձեր բացթողումն է: Մենք պատրաստ ենք լսել կառուցողական ցանկացած առաջարկ, որպէսզի միասին կարգաւորենք այս դաշտը»,- նշել է քաղաքապետը: Կարէն Կարապետեանը գործակալութիւններին առաջարկել է ակտիւօրէն համագործակցել Երեւանի քաղաքապետարանի հետ, ներկայացնել ծրագրային յստակ առաջարկներ, ինչպէս նաեւ կարծիքներ, թէ ինչ սպասելիքներ ունեն զբօսաշրջային գործունէութեան դաշտում ներգրաւուած ընկերութիւնները քաղաքապետարանից` Երեւանը զբօսաշրջութեան առումով առաւել գրաւիչ դարձնելու հարցում: Ողջունելով Երեւանի քաղաքապետի նախաձեռնութիւնը, ընկերութիւնների ներկայացուցիչները խոստացել են առաջիկայում առաւել յստակ առաջարկների փաթեթ ներկայացնել:

---