Կիպրոսում, Այի Նապայի վանքում, մարտի 3-ին Ուղղափառ Եկեղեցիների ներկայացուցիչները մէկշաբաթեայ խորհրդակցութիւն սկսեցին` ուսումնասիրելու Եկեղեցիների Համաշխարհային Խորհրդի «Հաւատք եւ Կարգ» յանձնախմբի ստեղծած «Եկեղեցու բնոյթն ու առաքելութիւնը» փաստաթուղթը: Խորհրդակցութեան նպատակն է համաշխարհային քննարկման նիւթ դարձած եկեղեցաբանութեան ընկալման վերաբերեալ ներկայացնել Ուղղափառ Եկեղեցիների տեսակէտը:
Հաւաքը հիւրընկալւում է Կիպրոսի Ուղղափառ Եկեղեցին: Հաւաքին մասնակցում էն շուրջ 40 հոգեւորականներ, աստուածաբաններ, երիտասարդներ, ԵՀԽ անդամ Արեւելեան Ուղղափառ եւ Հին Արեւելեան Ուղղափառ Եկեղեցիներից: Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի օրհնութեամբ հաւաքին մասնակցում է Մայր Աթոռ Սուրբ Էջմիածնի հրատարակչական բաժնի տնօրէն, «Հաւատք եւ Կարգ» յանձնախմբի անդամ Տ. Նաթան եպիսկոպոս Յովհաննիսեանը:
Ժողովի բացումը կատարեց Կիպրոսի Ուղղափառ Եկեղեցու պետ Նորին Ամենապատուութիւն Քրիզոստոմոս արքեպիսկոպոսը: Ապա բացման խօսքով հանդէս եկաւ ԵՀԽ փոխատենապետ, խորհրդակցութեան ատենապետ Սասիմայի Գենադիոս միտրոպոլիտը:
Ողջոյնի իր խօսքում ԵՀԽ գլխաւոր քարտուղար Օլաւ Թուեյթն անդրադարձաւ Եկեղեցիների Համաշխարհային խորհրդի եկեղեցաբանական ընկալման հարցի շուրջ Ուղղափառ Եկեղեցիների բերած կարեւոր ներդրմանը, խօսեց առաջիկայում Եամայկայում կայանալիք Խաղաղութեան կոնֆերանսի մասին:
Մայր Աթոռ Ս. Էջմիածին
Տեղեկատուական Համակարգ
Մարտի 7, 2011 թ.