Բացօթեայ առեւտրով զբաղուող անձանց, խորհրդարանի «Ժառանգութիւն» խմբակցութեան պատգամաւորների եւ ոստիկանների միջեւ մարտի 3-ի միջադէպը լաւագոյնս ցոյց տուեց, թէ ինչպիսին չպէտք է լինի ոստիկանը։ Մարտի 4-ի ասուլիսում այս մասին յայտարարեց «Ժառանգութիւն» խմբակցութեան քարտուղար Լարիսա Ալաւերդեանը։ Ըստ նար, այն փաստը, որ ոստիկանութիւնը ներկայացնում էր մի անձ, ով իրաւաբանական տարրական գիտելիքներ չունի, ինքնին խօսում է այն մասին, որ «վտանգուած է ոչ միայն հասարակութիւնը, վտանգուած է իշխանութիւնը»։ Լ.Ալաւերդեանը դժգոհութիւն յայտնեց Հանրային հեռուստատեսութեան կողմից «մոնտաժուած, հանրութեանը նուաստացնող» տեսանիւթից, որտեղ պատգամաւորի կամ քաղաքացու չարաճճիութիւնը ներկայացուել էն որպէս յանցագործութիւն, պետութեան դէմ ձեռնարկուած միջոցներ։ Լ.Ալաւերդեանն ընդգծեց, որ «օրէնքին հակառակ գործելով, անդաստիարակ ոստիկանները» իրենց թոյլ էին տուել անընդունելի տօնով խօսել «Ժառանգութիւն» խմբակցութեան անդամ Արմէն Մարտիրոսեանի հետ, ով 2008թ. մարտի 1-ին իր մարմնով ծածկել եւ փրկել էր ոստիկանին։ Լ.Ալաւերդեանն ընդգծեց, որ եթէ ոստիկանների գործողութիւնները չարժանան իրաւական գնահատականի ԱԺ ղեկավարութեան եւ իւրաքանչիւր պատգամաւորի կողմից, կը ստացուի, որ իրենք այդ բոլոր ապօրինութիւնների մասնակից են։ Արմէն Մարտիրոսեանը շնորհակալութիւն յայտնեց ոստիկանութեանը, որը «մեզ մօտ չյայտնաբերեց ոչ զէնք, ոչ զինամթերք, ոչ ատոմային բոմբ, նոյնիսկ մէկ փայտ չգտան», այսինքն՝ որեւէ մէկը չի կարող չհամաձայնել, որ դա խաղաղ ցոյց էր։ Անգամ ոստիկանութեան կադրերում յստակ երեւում է, որ որեւէ անօրինական գործողութիւն «Ժառանգութեան» պատգամաւորների ու քաղաքացիների կողմից չի եղել։ Մինչդեռ ոստիկանները խախտել էն օրէնքը քաղաքացիների, ինչպէս նաեւ անձեռնմխելիութեամբ օժտուած պատգամաւորների հանդէպ։ Խօսքն ուղղելով Հանրային հեռուստատեսութեանը՝ պատգամաւորը յայտարարեց, «որտե՞ղ դուք տեսաք «Ժառանգութեան» պատգամաւորների կամ մէկ տասնեակ կանանց մօտ այդպիսի ագրեսիւ տրամադրութիւններ, որ պատրաստւում էն լուսացոյցեր ջարդել, աղբարկղեր վառել»։ Պատգամաւորն ընդգծեց, որ Հանրային հեռուստաընկերութիւնը գործում է հարկատուների հաշուին: «Էս՝ որպէս հարկատու, պահանջում եմ, որ ինքն անկողմնակալ տեղեկութիւն տա»,- ասաց Ա.Մարտիրոսեանը։ Արմէն Մարտիրոսեանն ի պատասխան հարցերի, նշեց, որ դէպքի առնչութեամբ ոստիկանութիւնում ծառայողական քննութիւնից միակ ակնկալիքն այն է, որ օրէնքը խախտողները պատժուէն, ծառայողական քննութիւնը պէտք է կոնկրէտ հետեւանք ունենա՝ առնուազն մէկ ոստիկան պէտք է հեռացուի համակարգից։ Նա հաստատեց, որ եթէ խնդիրը լուծում չստանայ մինչդատական փուլում, ապա «Ժառանգութիւն»-ը մտադիր է դիմել նաեւ դատական ատեաններին։

---