Սումգայիթեան ոճրագործութիւնն առայսօր համարժէք գնահատական չի ստացել։ Այս մասին փետրուարի 24-ի ասուլիսում յայտարարեց Հայաստանի Ազգային ժողովի «Ժառանգութիւն» խմբակցութեան քարտուղար Լարիսա Ալաւերդեանը։ Ըստ նրա, Հայաստանի Հանրապետութեան օրէնսդրութեան մէջ պէտք է յստակեցուի, որ «մեր մէջ ապրում էն Ադրբեջանի կողմից իրագործած Ցեղասպանութեան զոհերի ընտանիքները, եւ այդ ցեղասպան երկիրն Ադրբեջանն է»: Լ.ալաւերդեանը դժգոհութիւն յայտնեց, որ մինչ օրս չի ստեղծուել յատուկ իրաւաբանական խումբ` միջազգային իրաւունքի մասնագէտների մակարդակով եւ որեւէ աշխատանք չի իրականացուել սումգայիթեան ոճրագործութեան մեղաւորներին պատժելու ուղղութեամբ: Պատգամաւորը գտնում է, որ 1988-94թթ. Ադրբեջանի կողմից իրականացուած սպանդը եւ հայրենազրկումը նոյն Ցեղասպանութեան քաղաքականութիւնն է, ինչպիսին իրականացրել է Թուրքիան 1915-23թթ.։ «Ադրբեջանական ղեկավարութիւնը, բոլոր ժամանակներում հերոսացնելով հայերի սպանողներին, ապացուցում է, որ սա միակ քաղաքականութիւնն է, որը որդեգրել է Ադրբեջանի Հանրապետութիւնը եւ շարունակում է մինչ օրս եւ չի յաւակնում դրանից հրաժարուել նաեւ ապագայում»,- ասաց Լ.Ալաւերդեանը։ Այդուհանդերձ պատգամաւորը գտնում է, որ դեռեւս ոչինչ կորած չէ, քանի որ սումգայիթեան դէպքերի վերաբերեալ գոյութիւն ունէն բազմաթիւ ապացոյցներ` դատական եզրակացութիւններ, ադրբեջանցիների, ինչպէս նաեւ Ադրբեջանում ապրող լեզգիների, թալիշների վկայութիւններ: «23 տարի անց ես, այնուամենայնիւ, յոյս ունեմ, որ գործող իշխանութիւնների համար այս հարցը կը դառնայ Հայաստանի պետական քաղաքականութեան մի մաս: Մենք պէտք է Ադրբեջանը հռչակենք որպէս ցեղասպանաստեղծ հանրապետութիւն, որը Թուրքիայից աւելի արիւնարբու է»,- ընդգծեց ԱԺ պատգամաւորը, յաւելելով, որ պէտք է հասնել նրան, որ սումգայիթեան դէպքերի ժամանակ տուժած ընտանիքները ստանան երեք տեսակի փոխհատուցում` նիւթական, հոգեբանական եւ բժշկական:

---