ԵՐԵՎԱՆ, 22 ՓԵՏՐՈՒԱՐԻ, ՆՈՅԵԱՆ ՏԱՊԱՆ: ՀՀ ԱԺ Տնտեսական հարցերի
մշտական յանձնաժողովի նախագահ Վարդան Այվազեանը փետրուարի 22-ի
ասուլիսում, խօսելով հարկային օրէնսդրութեան ոլորտում իրականացուած
վերջին բարեփոխումների մասին, նշեց, որ պետութեան խնդիրն է
պարզեցնել հարկային օրէնսդրութեան մեխանիզմները: Անդրադառնալով
հարկային վարչարարության դիւրացման եւ հարկային
հաշվետվությունների էլեկտրոնային համակարգի ներդրման
արդիւնաւէտութեանը, նա կարեւորեց այն փաստը, որ տնտեսվարողի եւ
հարկային մարմնի միջեւ ուղղակի շփումների վերացման հետեւանքով
նվազեցվում են կոռուպցիոն ռիսկերը: Ըստ Վ.Այվազեանի, մինչեւ
2014թ.-ը էլեկտրոնային հաշվետվությունների ներկայացումը կլինի
կամավորության սկզբունքով, իսկ 2014թ.-ից` պարտադիր: «Այժմ գնում
ենք խրախուսման մեթոդով. եթէ հարկ վճարողը էլեկտրոնային եղանակով
է հաշուէտւութիւն ներկայացնում, ստանում է որոշակի
արտօնութիւններ»,- նշեց Վ.Այվազեանը:
Յաջորդ կարեւոր բարեփոխումն, ըստ բանախօսի, լիցենզաւորման
գործընթացի դիւրացմանն ուղղուած քայլերն են: «Նախորդ եւ այս տարի
չի եղել մի դէպք, ուր բիզնես բեռը աւելացել է ֆիսկալ առումով,
այսինքն, չի եղել դրույքչափերի աւելացում»,- ասաց Վ.Այվազեանը,
միաժամանակ նշելով, թէ այլ խնդիր է, որ տնտեսութեան աճը ճգնաժամի
պայմաններում բաւարար չէր եւ իրական գնաճը «խժռեց» տնտեսական աճի
դրական միտումները: Նրա դիտարկմամբ, եթէ գիւղատնտեսութեան
ոլորտում աճ արձանագրուեր, ապա տնտեսական աճի առումով լուրջ
արդիւնքներ կունենայինք: Այս տարի Վ.Այվազեանն աւելի լուրջ աճ է
կանխատեսում, քանի որ կառավարութիւնում կուտակուած ֆինանսական
ռեսուրսները ամբողջութեամբ կդրուեն շրջանառութեան մէջ:
Հարկային ոլորտի հիմնական խնդիրը, ըստ բանախօսի, հաշուառման ու
ստուերային շրջանառութեան չհարկման հանգամանքն է: Վ.Այվազեանի
հարկման տրամաբանությունը պէտք է լինի այսպիսին. «Հարուստը շատ
պէտք է հարկուի, շատ եկամուտ ստացողը շատ հարկ պէտք է տայ»:
Ասուլիսին միւս մասնակցի` «Հայաստանի գործատուների
հանրապետական միութեան» գործադիր տնօրէն Գագիկ Մակարեանի,
խօսքերով, հարկային օրէնսդրութեան բարեփոխումները հետապնդում են 2
նպատակ` աւելի կատարելագործել հարկահավաքումն ու պակասեցնել
վարչարարությունը եւ բիզնեսի զարգացման համար ստեղծել բարենպաստ
միջավայր, որն էլ իր հերթին կնպաստի հարկերի աւելացմանը: Նա դրական
գնահատեց լիցենզաւորման գործընթացի հեշտացումը, բայց միաժամանակ
նշեց, որ կապուած ժամկէտների հետ` գործընթացում բաւականին
խախտումներ են արձանագրւում: «Կոռուպցիոն ռիսկերի նուազումը միայն
հարկային վարչարարության եւ օրէնսդրութեան բարեփոխումների մէջ չէ.
այն կախուած է նաեւ ժամկէտներից, որովհետեւ դրանց խախտման դէպքում
գործարար համայնքը պատրաստ չէ կիրառել այդ ամէնն ու ցանկացած
ստուգում ռիսկեր է առաջացնում»,- ասաց Գ.Մակարեանը:
Ինչ վերաբերւում է էլեկտրոնային հաշվետվությունների համակարգի
ներդրմանը, ապա Գ.Մակարեանը նշեց, որ դեկտեմբեր եւ յունուար
ամիսների փորձը ցոյց տվեց, որ սպասարկող համակարգը ծրագրային
առումով ի վիճակի չէր այդ ծաւալներն իր վրայ կրելուն: «Համակարգն
ինքը գերծանրաբեռնվեց եւ նոյնիսկ որոշակի պարալիզացում տեղի
ունեցաւ: Մարդիկ բողոքում էին, որ չեն կարողանում իրենց
գործարքներն իրականացնել»,- ասաց նա: