ԱԹԷՆՔ, 18 ՅՈՒՆՎԱՐԻ, ՆՈՅԵԱՆ ՏԱՊԱՆ: Յունաստանի նախագահ Կարոլոս Պապուլիասի հրաւէրով յունվարի 18-ին Հայաստանի նախագահ Սերժ Սարգսեանը տիկնոջ` Ռիտա Սարգսեյանի, հետ ժամանել է Աթէնք: Դիմաւորման պաշտօնական արարողութիւնից յետոյ տեղի է ունեցել Ս.Սարգսեյանի եւ Կ.Պապուլիասի առանձնազրոյցը, որին յաջորդել է երկու երկրների պատուիրակութիւնների մասնակցութեամբ ընդլայնուած կազմով հանդիպումը: Երկու երկրների նախագահները քննարկել են հայ-յունական բարձր մակարդակի քաղաքական երկխօսութեան շարունակաբար զարգացման, առեւտրատնտեսական, ռազմական, մշակոյթային եւ այլ ոլորտներում համագործակցութեան խորացման, ԵՄ Արեւելյան գործընկերութեան ծրագրի շրջանակներում փոխգործակցութեան ակտիւացման, ինչպէս նաեւ տարածաշրջանային եւ փոխադարձ հետաքրքրութիւն ներկայացնող միջազգային հարցեր, անդրադարձել ԼՂ հիմնախնդրի կարգաւորման վերջին զարգացումներին: Այցի շրջանակներում տեղի է ունեցել նաեւ մի շարք ոլորտներում երկկողմ կապերի ամրապնդմանն ու համագործակցութեան խորացմանն ուղղուած փաստաթղթերի ստորագրման արարողութիւն: Մասնաւորապէս, ստորագրուել են «Հայաստանի Հանրապետութեան պաշտպանութեան նախարարութեան եւ Յունաստանի Հանրապետութեան ազգային պաշտպանութեան նախարարութեան միջեւ ռազմական համագործակցութեան վերաբերեալ համաձայնագիր», «ՀՀ կառավարութեան եւ Յունաստանի Հանրապետութեան կառավարութեան միջեւ կրթութեան, գիտութեան եւ մշակոյթի բնագաւառներում 2011-2013թթ. համագործակցութեան մասին ծրագիր», «Հայաստանի Հանրապետութեան մշակոյթի նախարարութեան եւ Յունաստանի Հանրապետութեան մշակոյթի եւ զբօսաշրջութեան նախարարութեան միջեւ 2012 թուականին` Յունաստանի Հանրապետութիւնում «Հայկական մշակոյթի օրեր» եւ 2013 թուականին` Հայաստանի Հանրապետութիւնում «Յունական մշակոյթի օրեր» կազմակերպելու եւ անցկացնելու մասին փոխըմբռնման յուշագիր»: Ըստ ՀՀ նախագահի Մամլոյ գրասենեակի հաղորդագրութեան, Ս.Սարգսեանը եւ Կ.Պապուլիասը հանդիպման արդիւնքներն ամփոփել են համատեղ ճեպազրույցում: Շնորհակալութիւն յայտնելով Յունաստանի նախագահին Հայաստան այցելելու իր հրաւէրն ընդունելու եւ ցուցաբերած ջերմ ընդունելութեան համար, Ս.Սարգսեանն այնուհետեւ ասել է. «Բարձր մակարդակի այս շփումները մենք դիտում ենք որպէս հայ-յունական քաղաքական երկխօսութիւնը շարունակաբար զարգացնելու փոխադարձ ցանկութիւն: Ուրախ եմ, որ Ձեզ հետ մենք բովանդակալից եւ արդիւնաւէտ զրույց ունեցանք երկկողմ համագործակցութեան ամրապնդման, փոխադարձ հետաքրքրութիւն ներկայացնող տարածաշրջանային եւ երկկողմ մի շարք հարցերի շուրջ: Արձանագրեցինք, որ կարող ենք աւելին անել եւ պայմանաւորուեցինք լրացուցիչ ջանքեր ներդնել հայ-յունական փոխգործակցությունը նոր մակարդակի հասցնելու, այդ փոխգործակցությանը նոր դինամիկա հաղորդելու ուղղութեամբ: Հարուստ իրավապայմանագրային դաշտը, որ ընդգրկում է երեք ու կէս տասնեակ պայմանագրեր, այսօր է'լ աւելի հարստացաւ եւ մեր գերատեսչութիւններին համագործակցելու աւելի մեծ հնարաւորութիւն ընձեռեց: Կուզենայի յատուկ առանձնացնել պաշտպանական գերատեսչութիւնների միջեւ համագործակցութիւնը` հաշուի առնելով, որ այդ գերատեսչութիւնները, դրանց գործունէութիւնը մշտապէս գտնւում են մեր ուշադրութեան կենտրոնում: Կարեւորեցինք հայ եւ յոյն գործարարների Աթէնքում ընթացող համաժողովը եւ եկանք այն եզրակացութեան, որ ինչպէս Յունաստանի, այնպէս էլ Հայաստանի տնտեսությունները թոթափում են ճգնաժամի հետեւանքները, եւ մեր գործարարները կարող են շատ բան անել` օր առաջ այդ ճգնաժամի հետեւանքները յաղթահարելու համար: Մենք երկուստեք կարեւորեցինք մշակոյթային կապերի եւ մարդկային շփումների ընդլայնման կարեւորութիւնն ու անհրաժեշտութիւնը: Եվ ես վստահ եմ, որ գալիք տարիներին անցկացուելիք հայկական մշակոյթային օրերը Յունաստանում եւ յունական մշակոյթային օրերը Հայաստանում անցնելու են բարձր մակարդակով եւ է'լ աւելի են ամրապնդելու մեր մշակոյթային կապերը, մեր բարեկամ ժողովուրդների յարաբերութիւնները: Ես իմ յոյն գործընկերոջը ներկայացրեցի Լեռնային Ղարաբաղի հիմնախնդրի կարգաւորման վերջին զարգացումները: Վերահաստատեցի հայկական կողմի դիրքորոշումը, որ, չնայած Բաքուի կողմից ուժի կիրառման անվերջ սպառնալիքներին, մենք հաւատարիմ ենք հակամարտութիւնը ԵԱՀԿ Մինսկի խմբի բանակցային ձեւաչափով կարգաւորելու քաղաքականութեանը: Հայաստանը փորձեց Թուրքիային ընդառաջ քայլ կատարել` հարեւան երկրներին վայել յարաբերութիւններ հաստատելու ուղղութեամբ, բայց չգտանք անհրաժեշտ քաղաքական կամք Թուրքիայի կողմից: Ես ուրախ եմ լսելու, որ նաեւ մեր գործընկերները դէմ չեն Թուրքիայի անդամակցութեանը Եւրոպական միութեանը, բայց այդ նպատակակետն անցնում է սեփական անցեալի եւ հարեւանների հետ քաղաքակիրթ գործակցութեան ճանապարհներով: Եվ երբ Թուրքիան համապատասխանի եւրոպական չափանիշներին, մենք կունենաք աւելի կանխատեսելի հարեւան: Մենք ընդգծեցինք նաեւ միջազգային կազմակերպություններում համագործակցութիւնն ընդլայնելու անհրաժեշտութիւնը»: Ամփոփելով իր խօսքը, Ս.Սարգսեանը հոյս է յայտնել, որ հայ-յունական համագործակցութիւնն օր-օրի զարգանալու է:

---