Մայիսի 10-ին ՀՀ վարչապետ Տիգրան Սարգսեանը հանդիպել է Եւրոպական ժողովրդական կուսակցութեան նախագահ Ուիլֆրեդ Մարթենսի հետ: Հանդիպումից յետոյ տեղի է ունեցել վարչապետի եւ ԵԺԿ նախագահի ճեպազրոյցը լրատուամիջոցների ներկայացուցիչների համար: Ստորեւ ներկայացնում ենք ճեպազրոյցի սղագրութիւնը: Ներկայացնում ենք Տիգրան Սարգսեանի եւ Եւրոպական ժողովրդական կուսակցութեան նախագահ Ուիլֆրեդ Մարթենսի ճեպազրոյցի սղագրութիւնը. Տիգրան Սարգսեան - Հայաստանի Հանրապետութիւնում է Եւրոպայի ժողովրդական կուսակցութեան նախագահ պարոն Մարթենսը: Դուք յիշում էք մեր նախորդ հանդիպումը պարոն Մարթենսի հետ, որը տեղի ունեցաւ Երեւանում, եւ դուք մասնակցում էիք նրա գրքի շնորհանդէսին եւ տեղեակ էք, որ Հայաստանի հանրապետական կուսակցութիւնը բանակցութիւններ է վարում Եւրոպայի ժողովրդական կուսակցութեան հետ` անդամակցութեան վերաբերեալ: Բրիւսէլ կատարած իմ պաշտօնական այցելութեան ժամանակ մենք նոյնպէս պատիւ ունեցանք հանդիպել պարոն Մարթենսի հետ եւ քննարկել մեր օրակարգում առկայ հարցերը: Այդ հարցերից առաջինը Հայաստանի հանրապետական կուսակցութեան դիմումն է Եւրոպական ժողովրդական կուսակցութեան անդամակցութեան վերաբերեալ: Երկրորդ խնդիրը բարեփոխումներն են, որոնք իրականացւում են Հայաստանի Հանրապետութիւնում, մասնաւորապէս, Եւրոմիութեան հետ Հարեւանութեան ծրագրի շրջանակներում: Եւ երրորդ խումբ խնդիրներն արժէքային համակարգին վերաբերող խնդիրներն են, Հայաստանի Հանրապետութիւնն արժէքային դաշտում իրեն ինչպէս է դիրքաւորում նրա տեսլականը ապագայի նկատմամբ եւ մասնաւորապէս հանրապետական կուսակցութիւնը ինչ արժէքային համակարգի է դաւանում, ինչ արժէքներ է քարոզում Հայաստանի Հանրապետութիւնում: Բարով էք եկել Հայաստան պարոն Մարթենս, ուրախ ենք ձեզ դիմաւորելու, համոզուած ենք, որ մեր երկխօսութիւնը նպաստելու է Հայաստանի Հանրապետութիւնում բարեփոխումների ընթացքը արագացնելուն: Ուիլֆրեդ Մարթենս - Շնորհակալութիւն պարոն վարչապետ այս հրաւէրի համար: Մէկ տարուայ ընթացքում սա իմ երկրորդ այցելութիւն է: Ես օգտուեցի պարոն վարչապետի հրաւէրից, որպէսզի շարունակենք մեր երկխօսութիւնը նշուած երեք թեմաների վերաբերեալ: Մենք շատ հետաքրքրուած ենք Եւրամիութեան հետ Հարաւկովկասեան երկրների հետ հարեւանութեան ծրագրով, եւ այն ամէնով ինչ տեղի է ունենում Եվրանեստի շրջանակներում: Ընդամէնը երկու շաբաթ առաջ Բրիւսէլում առաջին խորհրդարանական վեհաժողովն աւարտուեց: Մենք որպէս Եւրոպայի ժողովրդական կուսակցութիւն շատ հետաքրքրուած ենք ունենալ արժանաւոր գործընկերներ այլ երկրներում: Աշնանը մեր կուսակցութեան պաշտօնական առաքելութիւն այցելելու է Հայաստան: Յուսով եմ, որ այդ առաքելութեան յանձնարարականը դրական կը լինի, որպէսզի մենք կարողանանք դրական լուծում տալ Հայաստանի հանրապետական կուսակցութեան անդամակցութեան հարցին: Երկրորդն այն բոլոր բարեփոխումները, որը վարչապետի կառավարութիւնը իրականացնում է, ի հարկէ, շատ կարեւոր են եւ ընտրական օրէնսգրքի վերաբերեալ բարեփոխումները խօսքի, միաւորումների ազատութեան նաեւ կոռուպցիայի դէմ պայքարը ապացուցում են, որ կառավարութիւնը կամք է դրսեւորում այդ բարեփոխումներն իրենց աւարտին հասցնելու հարցում: Ահա այն հիմնական հարցերը, տարրերը, որոնց հիման վրայ ես յուսով եմ, որ մենք կարող ենք որոշումներ կայացնել առ այն, որ Հայաստանի հանրապետական կուսակցութեան ծրագիրը համապատասխանում է Եւրոպական ժողովրդական կուսակցութեան հիմնական ծրագրին եւ նոր չափորոշիչը, անշուշտ, ժողովրդական քաղաքական կուսակցութիւնների կազմակերպումն է: Եւրոպական ժողովրդական կուսակցութեան անդամ դառնալու համար պէտք է ընդունել մեր հիմնական ծրագիրը, պէտք է ունենալ կանոնադրութիւն, կուսակցութեան կազմակերպման եւ գործունէութեան վերաբերեալ տեսլական, որը հիմնուած լինի կուսակցութեան ներքին ժողովրդավարութեան վրայ: 2012թ. Եւրոպական ժողովրդական կուսակցութիւնը նախատեսում է կազմակերպել համագումար, որպէսզի մեր հիմնական ծրագիրը յարմարեցնենք, հաշուի առնելով նոր մարտահրաւէրները եւ այն դրական զարգացումները եւ փոփոխութիւնները, որ տեղի են ունենում մասնաւորապէս Հայաստանում: Եւ իսկապէս յուսով եմ, որ այն բանից յետոյ, երբ Հհկ-ն կ'անդամակցի, կը մասնակցի այդ ներքին քննարկումներին, մեր արժէքային համակարգի վերաբերեալ այդ քննարկումներին, որոնք վերաբերում են ողջ Եւրոպային: Ազատութիւն ռադիօկայան - Պարոն Մարթենս, Հանրապետական կուսակցութիւնն աջ պահպանողական կուսակցութիւն է, որքանո՞վ է այն տեղաւորւում ԵԺԿ գաղափարախօսական համապատկերում: Ուիլֆրեդ Մարթենս- Եւրամիութեան հետ այդ քաղաքական համայնապատկերում Ժողովրդական կուսակցութիւնը եւրոպական քրիստոնեա-դեմոկրատական տիպի կուսակցութիւն է: 1990 թուականից կուսակցութեան ընդլայնումից ի վեր, մենք աջ կենտրոնամէտ ենք: Մեր կազմում կան քրիստոնէա-դեմոկրատական կուսակցութիւններ, պահպանողականներ եւ կենտրոնամէտներ: Ահա այսպիսի կազմ ունի մեր կուսակցութիւնների դաշնութիւնը Ժողովրդական կուսակցութեան ներսում: Այսինքն` մենք աջ կենտրոնամէտներ ենք, եւ եթէ իսկապէս Հայաստանի հանրապետական կուսակցութիւնը պահպանողական է, ուրեմն նա լիովին իրաւունք ունի այդ կուսակցութեանն անդամակցելու: Ազատութիւն ռադիօկայան - Եթէ կարելի է մի ճշտում, մինչ այդ որեւէ քաղաքական ուժի հետ Հայաստանում նման շփումներ եղել են, թէ՞ ոչ: Ուիլֆրեդ Մարթենս- Այո, ես հանդիպել եմ չորս կուսակցութիւնների հետ. Հայաստանի հանրապետական կուսակցութիւն, ,բարգաւաճ Հայաստանէ, ,օրինաց Երկիրէ եւ ,ժառանգութիւնէ կուսակցութիւններ: Ազատութիւն ռադիօկայան- Պարոն վարչապետ, հարցս վերաբերում է նախանցած շաբաթ Լիտուայի նախագահի այցի ընթացքում նշուած խնդրին` միջուկային անվտանգութեան վերաբերեալ. ի՞նչ հեռանկարներ կան միջուկային էներգետիկայի ոլորտում: Տիգրան Սարգսեան - Յիշում էք, որ կառավարութեան նիստերից մէկում ես անդրադարձել եմ այս հարցին: Յանձնարարական է տրուած էներգետիկայի նախարարին բոլոր շահագրգիռ գերատեսչութիւնների հետ միասին, հաշուի առնելով Ճապոնիայի իրադարձութիւնները, եւս մէկ անգամ ռեվիզիայի ենթարկել մեր անվտանգութեան բոլոր կանոնները եւ իրավիճակը: Այդ վարժութիւնը կատարուած է: Մենք սպասում ենք այս ամիս Մագատե-ի մասնագիտացուած առաքելութեան այցելութեանը Հայաստան, որը երկու շաբաթ սթրես-թեսթային հարցերով է զբաղուելու, որպէսզի բացայայտի մեր ատոմակայանի ուժեղ եւ թոյլ կողմերը: Մենք պատրաստ ենք այդ հանդիպմանը եւ ինքներս համապատասխան նախապատրաստական աշխատանքներ ենք կատարել` բարձրացնելու մեր ատոմակայանի անվտանգութիւնը: Հայաստանի Հանրային հեռուստատեսութիւն - Ինչի՞ց է սկսուելու համագործակցութիւնը, ինչո՞վ կ'արտացոլուի դա: Ուիլֆրեդ Մարթենս-պաշտօնական այդ առաքելութեան դրական գնահատման հիման վրայ, մենք կարող ենք որոշում կայացնել Հայաստանի հանրապետական կուսակցութեան անդամակցութեան վերաբերեալ եւ նոյն ընթացակարգը պէտք է անցնեն Հայաստանից միւս երեք թեկնածուները: Այնուհետեւ որոշում է կայացւում անդամակցութեան վերաբերեալ, որպէս դիտորդ անդամ-կուսակցութիւն: Եւ այդ որոշման հիման վրայ պատուիրակները հրաւիրւում են մասնակցելու Ժողովրդական կուսակցութեան քաղաքական վեհաժողովի այդ ժողովին եւ համագումարին, նաեւ ես հրաւիրում եմ այդ ժամանակ երկրի նախագահին կամ վարչապետին գագաթնաժողովին` Եւրոպական ժողովրդական կուսակցութեան ընդլայնուած գագաթնաժողովին: Այդ ընդլայնուած գագաթնաժողովին հրաւիրւում են եւ դրա մաս են կազմում երկրների նախագահները եւ կառավարութիւնների ղեկավարները կամ եթէ մենք իշխանութիւն չենք այդ երկրներում` ժողովրդական կուսակցութիւնը, ապա ընդդիմութեան ղեկավարին: Հայաստանի քաղաքական իրավիճակի պարագայում լաւ կը լինի կամ նախագահը կամ վարչապետը: Մէկ օրինակ բերեմ վերջին շրջանից. մենք ընդունել ենք արդէն Մոլդովայի ազատական ժողովրդավարական կուսակցութեանը փետրուար ամսին, ես հիմա պատրաստւում եմ հրաւիրել երկրի վարչապետին, որը կը մասնակցի Եւրոպական ժողովրդական կուսակցութեան ընդլայնուած գագաթնաժողովին: Առկայ գործակալութիւն` հարցը հայ թուրքական յարաբերութիւնների Թուրքիայի ԵՄ անդամակցութեան մասին: Ուիլֆրեդ Մարթենս-ես նախագահ Գիւլի եւ Հայաստանի նախագահի շփումներից յետոյ յոյս ունէի, որ նոր փուլ կը թեւակոխենք` յարաբերութիւնների բարելաւման փուլ: Շատ հիասթափուած եմ, որ գործընթացն այսպէս արգելափակուեց Թուրքիայի պատճառով: Ինչ վերաբերում է Թուրքիայի Եւրամիութեան անդամակցութեանը յիշեցնեմ, որ Եւրամիութեան անդամակցութեան հիմնական նպատակներից մէկը ոչ միայն տնտեսական չափորոշիչներն են, այլեւ անձանց ազատ տեղաշարժը Եւրամիութեան ներսում: Դա ամենահիմնական չափորոշիչներից մէկն է Եւրամիութեան համար: Ամէն դէպքում թեկնածու երկրի անդամակցութիւնն այս հիմնական չափորոշիչները բաւարարելու պայմաններում է կատարւում: Եւ նորմալ յարաբերութիւնների հաստատումը նաեւ Թուրքիայի եւ Հայաստանի միջեւ, ի հարկէ, դա աւելի բարենպաստ ազդեցութիւն կ'ունենար Թուրքիայի անդամակցութեան գործընթացում:

---