Կառավարութեան նախաձեռնութեամբ յունիսի 21-ին հրաւիրուած Ազգային ժողովի արտահերթ նստաշրջանում առաջին ընթերցմամբ քննարկուեց «Աղբահանութեան եւ սանիտարական մաքրման մասին» օրէնքի նախագիծը եւ դրանից բխող մի շարք գործող օրէնքներում լրացումների եւ փոփոխութիւնների փաթեթը: Ըստ այդմ, մասնաւորապէս, սահմանւում էն աղբահանութեան եւ սանիտարական մաքրման սկզբունքները, աղբահանութեան վճարի հաշուարկման կարգը եւ դրոյքաչափերը, վճարողների շրջանակը, նրանց իրաւունքները եւ պարտականութիւնները, վճարման կարգը, պատասխանատուութիւնը չվճարելու համար: Յիշեցնենք, որ կառավարութիւնն երկրորդ անգամ է ներկայացնում այս ոլորտը կարգաւորող օրէնսդրական նախաձեռնութիւն: Նախորդի ընդունումն երկրորդ ընթերցմամբ ԱԺ-ի 2010թ.-ի դեկտեմբերի 17-ի արտահերթ նիստում տապալուէր էր` քուէարկութեանն անհրաժեշտ թուով պատգամաւորների չմասնակցելու պատճառով: Հիմնական ընդդիմախօսները` ՀՅԴ եւ «Ժառանգութիւն» խմբակցութիւնները, քուէարկութիւնը բօյկօտել էին: Վերջինն այս արտահերթ նստաշրջանի աշխատանքներին չի մասնակցում, շարունակելով ԱԺ նիստերի` փետրուարի 28-ից սկսած բօյկօտը: Ինչ վերաբերում է ՀՅԴ-ին, ապա խմբակցութեան անդամ Արծուիկ Մինասեանն ընդգծեց, որ թէեւ նախորդ նախագծի համեմատ «Աղբահանութեան եւ սանիտարական մաքրման մասին» ներկայիս օրինագիծը կրել է փոփոխութիւններ, այդ թւում էապէս նուազել էն աղբահանութեան վճարի դրոյքաչափերը, այդուհանդերձ «կան սկզբունքային հարցեր, որոնց այս նախաձեռնութիւնը նոյնպէս չի պատասխանում»: Ըստ դաշնակցական պատգամաւորի, այն, ըստ էութեան, միայն վճարի մասին է, այն էլ` պարտադրուող վճարի, միայն վճարման առնչութեամբ քաղաքացիների ու աղբ հաւաքօղ օպերատորի եւ համայնքի միջեւ առաջացած յարաբերութեան մասին է: Ա.Մինասեանն ընդգծեց, որ բացակայում է աղբահանութեան եւ սանիտարական մաքրման հայեցակարգը` սկսած աղբի հաւաքումից եւ վերջացրած դրա վերամշակմամբ: «Այս նախագիծը նոյնպէս պէտք է բացասական դիրքորոշման արժանանայ, ինչպէս սրան նախորդող նախագիծը»,-ասաց նա:

---