Ֆրանսիայի ԱԺ պատգամաւոր Ռոլան Բլումը բարձրացրել է
ջաւախահայութեան խնդիրները
26-04-2010 18:28:00 | | Քաղաքական
ԹԲԻԼԻՍԻ, 26 ԱՊՐԻԼԻ, ՆՈՅԵԱՆ ՏԱՊԱՆ-ՀԱՅԵՐՆ ԱՅՍՕՐ: Ապրիլի
13-16-ը Ֆրանսիայի խորհրդարանականների պատուիրակութեան կազմում
Թբիլիսի կատարած այցի շրջանակներում, Ֆրանսիայի Ազգային ժողովի
պատգամաւոր Ռոլան Բլումը Վրաստանի խորհրդարանի եւ կառավարութեան
ներկայացուցիչների հետ իր հանդիպումների ընթացքում բարձրացրել է
ջաւախահայութեան իրաւունքների ոտնահարման խնդիրը: Պատգամաւորը նշել
է, որ վրացական իշխանութիւնները չեն լուծում ջաւախահայութեան
առջեւ ծառացած խնդիրները էթնիկ փոքրամասնությունների պաշտպանութեան
եւրոպական ժողովրդավարական չափանիշներին համապատասխան: Այս մասին
հաղորդում են Հայրենադարձութեան եւ հիմնավորման հասարակական
կազմակերպութիւնների «Երկիր» միութեան մամլոյ ծառայութիւնից:
Իր հանդիպումների ընթացքում պրն Բլումը յատուկ կենտրոնացել է
վրացական իշխանութիւնների կողմից շինծու մեղադրանքներով 10 տարուայ
ազատազրկման դատապարտուած ջավախահայ քաղաքական գործիչ Վահագն
Չախալյանի գործի վրայ: Ֆրանսիացի խորհրդարանականը նշել է, որ
վրացական իշխանութիւնները` հետապնդելով ջավախահայ ակտիւիստին,
առաջնորդւում են ակնյայտ քաղաքական շարժառիթներով: Վրացական
պաշտօնեաները չեն ընդունել պատգամաւորի փաստարկները` փորձելով
համոզել պրն Բլումին, որ Վահագն Չախալյանը «մի սովորական խուլիգան»
է, որը կրում է իր «արժանի» պատիժը:
Ներկայացնելով Վրաստան կատարած այցի շրջանակներում Ջավախքի
խնդիրների շուրջ իր ունեցած քննարկումների արդիւնքները` պրն
Բլումը հաւաստիացրել է «Երկիր» միութեանը, որ նա շարունակելու է
ջաւախահայութեան իրաւունքների պաշտպանութեան ուղղութեամբ իր
ջանքերը եւ մասնաւորապէս, քայլեր է ձեռնարկելու Վահագն Չախալյանի
հարցը Եվրախորհրդի խորհրդարանական վեհաժողովի 2010 թ. ապրիլի
26-30-ի նստաշրջանում բարձրացնելու ուղղութեամբ: