Լեւոն Տեր-Պետրոսեան. «Եվս մի այսպիսի նախաձեռնողական
քաղաքականութիւն` եւ Հայաստանից ու Արցախից ոչինչ չի մնայ»
01-03-2010 21:04:00 | Հայաստան | Քաղաքական
ԵՐԵՎԱՆ, 1 ՄԱՐՏԻ, ՆՈՅԵԱՆ ՏԱՊԱՆ: «Եվս մի այսպիսի
նախաձեռնողական քաղաքականութիւն` եւ Հայաստանից ու Արցախից ոչինչ
չի մնայ»,- մեկնաբանելով ՀՀ նախագահ Սերժ Սարգսեյանի վարած արտաքին
քաղաքականութիւնը` մարտի 1-ի հանրահաւաքում յայտարարեց ՀՀ առաջին
նախագահ, Հայ Ազգային կոնգրեսի (ՀԱԿ) առաջնորդ Լեւոն
Տեր-Պետրոսեանը: Նրա խօսքերով, առասպել է այն խօսակցութիւնը, թէ
իբր հայ-թուրքական հաշտեցման գործընթացը մտել է փակուղի:
Իրականում, ըստ ՀԱԿ-ի առաջնորդի, Թուրքիան հասել է իր ուզածին`
կասեցրել է Հայոց ցեղասպանութեան ճանաչման գործընթացը, այժմ
բոլորովին շտապելու կարիք չունի եւ բանակցութիւնները Հայաստանի
հետ կշարունակի միայն ղարաբաղեան խնդրում իր ակնկալած առաջընթացի
դէպքում: Լ.Տեր-Պետրոսեանի դիտարկմամբ, Թուրքիան վաղուց է
ապացուցել, որ ինքը ճնշումներից վախեցող երկիր չէ: Այդ ամէնը,
ինչպէս յայտարարեց ՀՀ առաջին նախագահը, նշանակում է, որ
Ս.Սարգսեյանի վարած արտաքին քաղաքականութիւնը խայտառակ կերպով
ձախողուել է:
Ինչ վերաբերում է մարտի 1-ի խորհրդին, ապա, ըստ
Լ.Տեր-Պետրոսեանի, այն առաջին հերթին տասը զոհերի ոգեկոչման եւ
ոճիրը համակողմանիօրէն գնահատելու օրն է: Նա յաւելեց, որ խօսելով
2008թ.-ի մարտի 1-ի դէպքերի մասին` շատերը մոռանում են դրանց
սկզբնապատճառը` կեղծուած նախագահական ընտրութիւնները: Առաջին
նախագահը նշեց, որ եթէ այդ կեղծիքը չլինէր, ժողովուրդը 10 օր
շարունակ հանրահաւաքների չէր մասնակցի, իսկ իշխանութիւնը զավթած
մարդիկ բռնութեան դիմելու կարիք չէին ունենայ: Նրա կանխատեսմամբ,
գալու է մի օր, երբ 2008թ.-ի մարտի 1-ի սպանդի նախօրոք
կազմակերպուած լինելը Հաագայի միջազգային դատարանում դառնալու է
նախկին նախագահ Ռոբերտ Քոչարեանի դէմ հարուցվելիք քրէական գործի
հիմնական փաստարկը:
Լ.Տեր-Պետրոսեանի ելոյթից առաջ հնչեցին շուրջ մէկ տասնեակ
ելոյթներ: ՀԱԿ-ի ներկայացուցիչ Վահագն Խաչատրեանն ու ՀՀ նախկին
վարչապետ Հրանտ Բագրատեանն անդրադարձան գազի գնի թանկացմանը`
նշելով, որ դա ամէնեւին կապ չունի ռուսական գազի սակագնի
բարձրացման հետ: Պարզապէս, Հ.Բագրատեանի խօսքերով, ՀՀ
իշխանութիւնները այդպիսով «լրացուցիչ հարկ են դրել ժողովրդի վրայ,
որպէսզի վերջինս ակամայ սուբսիդավորի հարուստներին»:
Հանրահաւաքի աւարտից յետոյ ցուցարարները երթով անցան Երեւանի
կենտրոնական փողոցներով: