«Մենք չունենք լաւ քննիչներ, եւ սա լուրջ պրոբլեմ է»,- ասում
է Հայաստանի Փաստաբանների պալատի նախագահը
26-02-2010 17:16:00 | Հայաստան | Հասարակութիւն
ԵՐԵՎԱՆ, 26 ՓԵՏՐՈՒԱՐԻ, ՆՈՅԵԱՆ ՏԱՊԱՆ: Փաստաբանական գաղտնիքը
պաշտպանուած է օրէնքով, եւ ոչ ոք իրաւունք չունի այն խախտել: Այս
մասին փետրուարի 26-ի ասուլիսում յայտարարեց Հայաստանի Փաստաբանների
պալատի նախագահ Ռուբէն Սահակեանը: Նա դատապարտեց Երեւանի Էրեբունու
վարչական շրջանի քննիչի կողմից փաստաբան Արա Զոհրաբյանի համակարգչի
եւ տպիչի առգրաւման մասին որոշումը, ինչը քննիչի տարրական
անգրագիտութեան եւ դատախազական հսկողութեան բացակայութեան հետեւանք
է: «Մենք չունենք լաւ քննիչներ, եւ սա լուրջ պրոբլեմ է»,- նշեց
Ռ.Սահակեանը:
Գործարարներ Խաչատուր եւ Սարիբեկ Սուքիասյանների փաստաբան
Ա.Զոհրաբյանը նշեց, որ իր համակարգիչում կան ոչ միայն
փաստաբանական, այլեւ բանկային գաղտնիք պարունակող տեղեկութիւններ:
Իսկ խնդրօ առարկայ փաստաթուղթը առնչւում է «Հայէկոնոմբանկ»-ի
խորհրդի նախագահ Ս.Սուքիասյանի դէմ յարուցուած քրէական գործին,
սակայն այն գործի «ոչ օբյեկտ է, ոչ առարկայ»: Փաստաբանը միաժամանակ
պարզաբանեց, որ օրէնքը նախատեսում է փաստաբանական գաղտնիք
հրապարակելու երեք դէպք` վստահորդի համաձայնութեան, վստահորդի եւ
փաստաբանի միջեւ վեճի, նախապատրտաստվող ծանր հանցագործութեան
առկայութեան դէպքում:
Ա.Զոհրաբյանը յայտարարեց, որ եթէ համակարգիչը առգրաւելու
մասին որոշումը չվերացուի, ինքն այն կը բողոքարկի դատական կարգով, իսկ
դրական լուծում չստանալու դէպքում կդիմի նաեւ Սահմանադրական
դատարան եւ Մարդու իրաւունքների եւրոպական դատարան: