Ամենայն Հայոց Կաթողիկոսն ընդունեց Հայաստանում Եւրոպական միութեան պատուիրակութեան ղեկավարին
23-07-2015 18:59:03 | Հայաստան | Մամլո հաղորդագրություն
Յուլիսի 23-ին Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց ՀՀ-ում Եւրոպական միութեան պատուիրակութեան ղեկավար, դեսպան Տրայեան Հրիսթէային:
Առաքելութիւնն աւարտելու կապակցութեամբ Մայր Աթոռ այցելած Եւրոպական միութեան պատուիրակութեան ղեկավարը Մայր Աթոռ Ս. Էջմիածնի հետ ունեցած համագործակցութեան համար շնորհակալութիւն յայտնեց Նորին Սրբութեանը` ներկայացնելով անցնող չորս տարիների ընթացքում Հայաստանի կեանքի տարբեր ոլորտներում իր կողմից ծաւալուած գործունէութիւնը:
Դեսպանը մասնաւոր անդրադարձ կատարեց համընդհանուր արժէքների պահպանութեան ու ամրապնդման, մարդու իրաւունքների պաշտպանութեան գործում ԵՄ պատուիրակութեան գործադրած ջանքերին` նշելով, որ դրանց է ուղղուած նաեւ Հայոց Եկեղեցու առաքելութիւնը:
Այնուհետեւ Գարեգին Բ Վեհափառ Հայրապետը Հայաստանին բերած ծառայութեան համար իր գնահատանքը յայտնեց պրն. Տրայեան Հրիսթէային` գոհունակութեամբ փաստելով ԵՄ կողմից երկրին ցուցաբերուող զօրակցութիւնը: Զրոյցի ընթացքում Նորին Սրբութիւնն ընդգծեց հոգեւոր-բարոյական արժէքների զօրացման կարեւորութիւնը, որոնցով հնարաւոր պիտի լինի յաղթահարել Հայրենիքի եւ ժողովրդի առջեւ ծառացած բոլոր դժուարութիւններն ու կերտել բարօր կեանք:
Վերջում Վեհափառ Հայրապետը յետագայ գործունէութեան մէջ յաջողութիւններ մաղթեց պրն. Տրայեան Հրիսթէային:
Հանդիպմանը խօսուեց նաեւ ՀՀ-ԵՄ յարաբերութիւնների եւ Լեռնային Ղարաբաղի հակամարտութեան խաղաղ կարգաւորման խնդրի մասին:
ԴԱՍ. ՀԱՅԵՐԵՆ 
Հայերեն
Русский
English
French