Մարմարա Մայր Աթոռ Ս. Էջմիածինը, Վրաստանի Հայոց թեմի միջոցաւ դիմում կատարեց Վրաստանի հռովմէա-կաթոլիկ եկեղեցւոյ պատասխանատուներու մօտ, խնդրելով որ անխաթար պահպանուի Ախալցխայի Երեւման Ս. Խաչ եկեղեցւոյ սկզբնական վիճակը։ Մայր Աթոռը մտահոգ է որ եկեղեցւոյ նորոգութեան ընթացքին եկեղեցւոյ արտաքին պատերու եւ խորանի մօտ գտնուող խաչքարերը հանուած ու փոխադրուած են Վրաստանի գաւառագիտական թանգարան։ Ամենայն Հայոց Կաթողիկոսի մամլոյ բանբեր Վահրամ Քհնյ. Մելիքեան այս նիւթի մասին ըսաւ հետեւեալը. »2009ի աշնան Վրաստանի իշխանութիւնները Ախալցխայի Ռապաթ թաղամասի վերնամասին մէջ գտնուող Երեւման Ս. Խաչ հայ կաթոլիկ եկեղեցին իր տարածքով յանձնեցին կաթոլիկ համայնքին՝ պայմանաւ որ եկեղեցին նորոգուէր։ Ըսեմ որ 7րդ դարէն սկսեալ մինչեւ 18րդ դար այս եկեղեցին կը պատկանէր Հայաստանեայց Եկեղեցիին։ Այնուհետեւ եկեղեցին գործածուեցաւ հայ կաթոլիկ համայնքի կողմէ, քանի որ Առաքելական եկեղեցւոյ հետեւորդներ չկային այդ շրջանին մէջ եւ եկեղեցին փակ էր։ Նկատի առնելով այն, որ յիշեալ եկեղեցին Հայոց եկեղեցւոյ պատմական ժառանգութեան մէկ մասնիկն է, Վրաստանի թեմի Առաջնորդին հաւաստիացումներ տրուած էին այն մասին թէ նորոգութեան ընթացքին հայկական ինքնութեան որեւէ նշան պիտի չոչնչանայ, ընդակառակը՝ լաւագոյնս պիտի պահպանուի։ Վերջերս տեղեկացանք որ խաչքարերը հանուած ու փոխադրուած են գաւառագիտական թանգարան։ Տեղաշարժուած են նաեւ եկեղեցւոյ բակին մէջ գտնուող հայկական ու վրացական արձանագրութիւններով տապանաքարերը։ Հարցի առընչութեամբ Մայր Աթոռը դիմած է Կաթոլիկ եկեղեցւոյ պատասխանատուներուն՝ եկեղեցւոյ սկզբնական վիճակը անխաթար պահպանելու խնդրանքով։ Վստահ ենք որ պատկան իշխանութիւններու կողմէ այս ուղղութեամբ անհրաժեշտ քայլերը պիտի առնուին«։

---