Մարմարա Այս օրերուն, Թուրքիոյ Պուրտուր քաղաքի մէջ կը շարունակուի ճատրակի մինչեւ 16 տարեկաններու համաշխարհային պատանեկան ողիմպիականը, ուր փայլուն խաղարկութիւն ցոյց կուտայ Հայաստանի խումբը։ Հայաստանցի պատանի ճատրակիստները չորս մրցումներ ունեցած են եւ 100 տոկոս արդիւնքով կը գլխաւորեն մրցաշարային աղիւսակը։ Երկրորդ եւ երրորդ տեղերը կը գրաւեն Հնդկաստանի եւ Թուրքիոյ խումբերը։ Հայաստանի խումբէն ներս առաջին խաղասեղանի վրայ հանդէս կուգայ Կարէն Գրիգորեան, իսկ երկրորդ խաղասեղանի վրայ՝ Ռոպէրթ Աղասարեան։ Խումբին մաս կը կազմեն նաեւ Յովհաննէս Կապուզեան, Դաւիթ Շահինեան ու Տիգրան Պետրոսեան։ Խումբը միջին վարկանիշով մասնակից 22 խումբերու միջեւ 3րդն է եւ ետ կը մնայ միայն Ռուսաստանի ու Հնդկաստանի ընտրանիներէն։

---