Դանիէլ Եօհաննեսը Հմհ-հայաստան ծրագրի իրականացման ընթացքի դիտարկման արդիւնքները ներկայացրեց Գարեգին Բ Կաթողիկոսին
04-05-2011 17:11:11 | Հայաստան | Տնտեսութիւն
Մայիսի 4-ին Մայր Աթոռ Սուրբ Էջմիածնում Գարեգին Բ Ծայրագոյն Պատրիարք եւ Ամենայն Հայոց Կաթողիկոսն ընդունեց «Հազարամեակի մարտահրաւէրներ» հիմնադրամի գլխաւոր գործադիր տնօրէն Դանիէլ Եօհաննեսին` Հհ-ում ԱՄՆ արտակարգ եւ լիազօր դեսպան Մարի Եօւանովիչի ուղեկցութեամբ:
Նորին Սրբութիւնը գոհունակութեամբ անդրադարձաւ այն կարեւոր ներդրմանը, որ հիմնադրամը կատարում է Հայաստանի տնտեսութեան զարգացման գործում: Ի դէմս ՀՄԿ գործադիր տնօրէնի Վեհափառ Հայրապետը գնահատանք յայտնեց Միացեալ Նահանգների ժողովրդին եւ բարի արդիւնաւորում մաղթեց հիմնադրամի աշխատանքներին:
Ամենայն Հայոց Կաթողիկոսը նաեւ վստահութիւն յայտնեց, որ Հայաստանը կը յաղթահարի իր առջեւ ծառացած դժուարութիւններն ու խնդիրները` դրանում մեծապէս կարեւորելով հոգեւոր արժէքների վերականգնումը:
Դանիէլ Եօհաննեսն իր հերթին Վեհափառ Հայրապետին ներկայացրեց Հմհ-հայաստան ծրագրի իրականացման ընթացքի դիտարկման արդիւնքները:
Զրոյցի ընթացքում, ի պատասխան հիւրի հարցումների, Ամենայն Հայոց Կաթողիկոսը ներկայացրեց Մայր Աթոռ Ս. Էջմիածնի առաքելութիւնը, անդրադարձաւ Հայոց Եկեղեցու առջեւ ծառացած մարտահրաւէրներին եւ դրանց յաղթահարման ուղիներին: