Ամենայն Հայոց Կաթողիկոսն ընդունել է Կորեայի Հանրապետութեան նորանշանակ դեսպանին
15-12-2015 17:45:11 | Հայաստան | Մամլո հաղորդագրություն
Դեկտեմբերի 15-ին Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Հայաստանի Հանրապետութիւնում Կորեայի Հանրապետութեան նորանշանակ արտակարգ եւ լիազօր դեսպան Պակ Ռոյ Բեօկին (նստավայրը` Մոսկուա):
Նորին Սրբութիւնը, նշանակման առիթով շնորհաւորելով դեսպանին, կարեւոր համարեց, որ երկու պետութիւնների համար փոխյարաբերութիւնների նոր շրջան է բացւում, ինչի արդիւնքում պիտի զօրանան նաեւ միջմշակութային ու միջկրօնական կապերը:
Զրոյցի ընթացքում Ամենայն Հայոց Կաթողիկոսն անդրադարձաւ Կորեայի եկեղեցիների հետ Մայր Աթոռի Միջեկեղեցական յարաբերութիւնների բաժնի համագործակցութեանը: Այս կապակցութեամբ Վեհափառ Հայրապետը վերյիշեց 2013 թ. Կորեայի Բուսան քաղաքում անցկացուած Եկեղեցիների Համաշխարհային Խորհրդի (ԵՀԽ) 10-րդ համաժողովին բերած իր մասնակցութիւնը եւ շփումը Կորեայում գործող Քրիստոնէական Եկեղեցիների հետ:
Իր հերթին Կորեայի դեսպանը վստահեցրեց, որ պաշտօնավարման ընթացքում կը փորձի լաւագոյն կերպով նպաստել հայ-կորեական բարեկամական յարաբերութիւնների ընդլանմանն ու արդիւնաւէտ գործակցութեան ամրապնդմանը:
Վերջում Նորին Սրբութիւնը պրն. Պակ Ռոյ Բեօկի` Հայաստանում իրականացուելիք դիվանագիտական առաքելութեանը բարի արդիւնաւորում մաղթեց:
Հանդիպմանը ներկայ էր Մայր Աթոռի Արտաքին յարաբերութիւնների եւ արարողակարգի բաժնի տնօրէն Գերաշնորհ Տ. Նաթան արքեպիսկոպոս Յովհաննիսեանը: