Հայոց ցեղասպանութիւնը հումանիտար աղէտ է, որի մասին
մարդկութիւնը պէտք է հիշի
21-04-2010 17:44:00 | Հայաստան | Քաղաքական
ԵՐԵՎԱՆ, 21 ԱՊՐԻԼԻ, ՆՈՅԵԱՆ ՏԱՊԱՆ: Հայոց ցեղասպանութիւնը,
ինչպէս եւ ցանկացած ցեղասպանութիւն, առաջին հերթին հումանիտար
աղէտ է, որի մասին մարդկութիւնը պէտք է հիշի եւ պատմական նիւթերը
հասու դարձնի ապագայ սերունդներին` ցեղասպանությունները յետագայում
չկրկնվելու համար: Ապրիլի 21-ին «Նովոստի» մամուլի միջազգային
կենտրոնում «Հայոց ցեղասպանութիւն. պատմական յիշողութիւն եւ
ժամանակակից իրողություններ» թեմայով Երեւան-Մոսկուա
հեռուստակամուրջի ընթացքում այս կարծիքը յայտնեց Կովկասեան
հետազօտութիւնների մոսկովեան կենտրոնի փոխտնօրեն Վլադիմիր
Զախարովը:
Այն, որ Հայոց ցեղասպանութեան փաստը պատմական տեսանկիւնից
անհերքելի է, համոզուած էին հեռուստակամուրջի բոլոր մասնակիցները:
Ուստի նրանք առաւելապէս անդրադարձան Թուրքիայի կողմից Հայոց
ցեղասպանութիւնը մինչեւ այժմ չճանաչելու պատճառներին,
հայ-թուրքական յարաբերութիւնների կարգաւորման հեռանկարներին եւ
այս հարցում գերտէրութիւնների դերակատարմանը:
Կովկասի ինստիտուտի տնօրէն, հայաստանցի քաղաքագէտ Ալեքսանդր
Իսկանդարեանը, մասնաւորապէս, նշեց, որ ցեղասպանութեան փաստի
չընդունման պատճառները լոկ քաղաքական են, քանզի անձամբ ինքը
Թուրքիայի սահմաններից դուրս չի հանդիպել այդ փաստը հերքող որեւէ
մէկի: Ըստ նրա, չճանաչումը մշտապէս պատճառաբանուել է Թուրքիայի հետ
ռազմավարական եւ բարեկամական հարաբերութիւններով: Ա.Իսկանդարյանի
համոզմամբ, Հայոց ցեղասպանութիւնը, անկասկած, կազմակերպել է
թուրքական պետութիւնը, եւ պաշտօնապէս ճանաչուելու դէպքում մեղաւոր
կճանաչուի այն իրագործած Օսմանեան կայսրութիւնը, այլ` ոչ թուրք
ժողովուրդը: Ըստ նրա, ակնյայտ է նաեւ, որ ժամանակակից թուրքերի
համար շատ դժուվար է ընդունել, որ դա իրագործել են իրենց նախնիները:
Ա.Իսկանդարեանը նշեց նաեւ, որ վերջին տարիներին Թուրքիայում
տեղաշարժ է նկատւում. սկսել են բարձրաձայնել Ցեղասպանութեան մասին,
ինչը նախկինում չկար:
Հայոց ցեղասպանութեան ինստիտուտ-թանգարանի տնօրէն Հայկ
Դեմոյանի կարծիքով, ցեղասպանութեան թեման որոշ դէպքերում
շահարկւում է, իսկ Թուրքիան նենգափոխում է պատմական փաստերը եւ
փորձում մատաղ սերնդին դաստիարակել իր կողմից կերտած
«կվազիպատմության» ոգով: Ըստ նրա, Թուրքիան քաջ գիտակցում է, որ
Հայոց ցեղասպանութեան ճանաչումը կհանգեցնի նաեւ փոխհատուցման:
Հ.Դեմոյանի խորին համոզմամբ, մեծ դեր է խաղում նաեւ հոգեբանական
գործօնը` այն վախը, որ կփլուզվի գաղափարախօսութիւնը, որի վրայ
կառուցոուած է պետութիւնը:
Ըստ ԱՊՀ-ի ինստիտուտի փոխտօրեն Վլադիմիր Ժարիխինի, չափազանց
կարեւոր է, որպէսզի պետութիւնը գտնի պատմական յիշողութեան եւ
արդիւնաւէտ լուծումների հաւասարակշռութիւնը: Այդ հարցում, ըստ
նրա, Ռուսաստանն ապաւինում է Հայաստանի ղեկավարութեան
իմաստնությանը: Նա նշեց նաեւ, որ, ցավոք, Սփիւռքը յաճախ
բացարձականացնում է պատմական յիշողութիւնն ի վնաս Հայաստանի
աշխարհաքաղաքական հետաքրքրութիւնների:
Վերջին պնդմանն ի պատասխան Ա.Իսկանդարեանը նշեց, որ Հայաստանը
եւ Սփիւռքը «հաղորդակից անօթներ» են: Բացի այդ, որ 1991թ.-ից ի
վեր նորանկախ Հայաստանի բոլոր երեք նախագահները մշտապէս յայտարարել
են հայ-թուրքական յարաբերութիւններն առանց նախապայմանների
կարգաւորելու պատրաստակամութեան մասին, ինչը Թուրքիայի կողմից
անտեսուել է: