Օգոստոսի 31-ին` նոր ուսումնական տարեշրջանի նախօրէին, Մայր Աթոռ Ս. Էջմիածնում՝ հանդիսապետութեամբ Մայր Աթոռի Արտաքին յարաբերութիւնների եւ արարողակարգի բաժնի տնօրէն Գերաշնորհ Տ. Նաթան արքեպիսկոպոս Յովհաննիսեանի, կատարուեց կրթութեան մշակների օրհնութեան կարգ:

 

Աւանդական դարձած այս արարողութեանը ներկայ էին ՀՀ կրթութեան եւ գիտութեան նախարար Լեւոն Մկրտչեանը, պետական եւ մասնաւոր բարձրագոյն ուսումնական հաստատութիւնների ռեկտորներ, ԱԺ Գիտութեան, կրթութեան, մշակոյթի, երիտասարդութեան եւ սպորտի մշտական յանձնաժողովի անդամներ, կրթական պետական կառոյցների ներկայացուցիչներ, տարբեր մարզերի հանրակրթական դպրոցների եւ մանկապարտէզների տնօրէններ,  մարզպետարանների վարչութեան պետեր եւ նախարարութեան աշխատակիցներ: 

Արարողութիւնը սկսուեց Մայր Աթոռի Քրիստոնէական դաստիարակութեան կենտրոնի տնօրէն Գերաշնորհ Տ. Վարդան եպիսկոպոս Նաւասարդեանի ողջոյնի խօսքով: «Ամէնքիս մեծագոյն երազանքն է, որ 25-ամեայ մեր երիտասարդ Հանրապետութիւնն օրաւուր հզօրանայ, ամուր լինի իր հիմքերի, իր սիւների վրայ, եւ կերտուեն դէպի ապագան հայեացքները յառած ազգային գիտակցութեամբ, եկեղեցական պատկանելութեամբ, հոգեւոր արժէքներով օժտուած ու լուսամիտ քաղաքացիներ: Այս գործում կարեւոր է ձեր առաքելութիւնը: Այս մտածումներով է, որ շնորհաւորում ենք ամէնքիդ՝ ի դէմս ձեզ՝ մեր կրթութեան գործի բոլոր պատասխանատուներին, դաստիարակներին, մանկավարժներին..., որպէսզի այս գողտրիկ արարողութեանը մասնակցելով՝ նորոգէք ձեր ուխտը, ձեր միտքն այն վեհ գործի հանդէպ, որ մենք կոչում ենք աստուածային, աստուածահաճոյ առաքելութիւն», - նշեց Վարդան Սրբազանը` մաղթելով, որ ուսումնական նոր տարում առատօրէն արդիւնաւորուեն կրթութեան գործի նուիրեալների ջանքերը` յանուն նոր սերնդի որակեալ կրթութեան, հայրենեաց աւանդներով ու քրիստոնէական արժէքներով դաստիարակութեան եւ Հայրենիքի ու ի Սփիւռս աշխարհի հայ ժողովրդի խաղաղ ու երջանիկ ապագայի: 

Արարողութեան աւարտին Տ. Նաթան արքեպիսկոպոս Յովհաննիսեանը կրթութեան ոլորտի պատասխանատուներին եւ մշակներին փոխանցեց Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի հայրական սէրը, պատգամն ու օրհնութիւնը Գիտելիքի օրուայ եւ նոր 2016-2017 ուսումնական տարուայ մեկնարկի առիթով: 

Սրբազան Հայրն ընդգծեց, որ կրթութեան մշակները պարտականութիւն ունեն սիրոյ միջնորդ դառնալու կրթութեան, գիտութեան, բարձր բարոյականութեան  եւ մեր մատաղ սերունդների միջեւ: Իր խօսքում Նաթան Սրբազանը մասնաւորապէս անդրադարձաւ ուսուցչի առաքելութեան գաղափարին: «Ուսուցիչը որքան էլ գիտելիքներ է տալիս, եւ որքան էլ գիտելիքը կարեւոր է, սակայն ուսուցիչն աստուածային արարչութեան մի մասնիկ է կրում, որ արարում է մարդ, իսկական մարդ՝ ապագայի լաւ քաղաքացի՝ օժտուած բարձր բարոյականութեամբ եւ բարձր գիտելիքներով: Ճիշտ է, որ մենք մշակ ենք կոչում կրթութեան անդաստանի բոլոր աշխատողներին, որովհետեւ իրապէս մշակի մի գործ է՝ մշակել, սերմեր ցանել, մշտապէս այդ սերմերը խնամել ու փայփայել, որպէսզի ստանանք այն պտուղները, որ իւրաքանչիւրիս երազանքն է: 

Այսօր տարբեր ձեւով են անուանում ուսուցիչներին՝ դասախօսներ, պրոֆէսորներ, բայց բոլորս մնում ենք ուսուցիչ, ուսուցիչ, որ ձեւաւորում է միտք, ձեւաւորում է մարդ եւ ձեւաւորում է ապագան», - նշեց Սրբազան Հայրը` մաղթելով, որպէսզի բոլոր աշակերտներն իրենց կեանքում մշտապէս յիշեն իրենց ուսուցիչներին, որպէսզի բոլոր սերունդները սեպտեմբերի 1-ը դիմաւորեն ուրախութեամբ ու լիուլի ցանկութիւններով:

Վերջում Նաթան արքեպիսկոպոսը հայցեց, որ Տիրոջ օրհնութիւնը միշտ ուղեկից լինի ներկաներին եւ առաջնորդի կրթութեան ու գիտութեան մշակներին իրենց պատուական ծառայութեան մէջ:

 

  -   Մամլո հաղորդագրություն