Սեպտեմբերի 24-ին` Ս. Գեւորգ զօրավարի տօնին, Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի նախագահութեամբ, Մայր Աթոռ Սուրբ Էջմիածնի Գեւորգեան հոգեւոր ճեմարանի հանդիսութիւնների դահլիճում տեղի ունեցաւ հանդիսութիւն: Երջանկայիշատակ Գեւորգ Դ Ամենայն Հայոց Կաթողիկոսի կողմից հիմնադրուած հոգեւոր ճեմարանը կրում է Ս. Գեւորգ զօրավարի անունը:

 

Միջոցառմանը ներկայ էին Մայր Աթոռի միաբաններ, Մայր Աթոռի հոգեւոր-կրթական հաստատութիւնների տեսչական ու դասախօսական անձնակազմը, Գեւորգեան հոգեւոր ճեմարանի սաներ եւ այլ հրաւիրեալներ:

Հանդիսութիւնը, որի ընթացքում նաեւ յանձնուեցին 2015-2016 ուսումնական տարեշրջանի աւարտական լսարանի դիպլոմները, բացուեց Տէրունական աղօթքով, որից յետոյ հնչեցին Հայաստանի Հանրապետութեան եւ Գեւորգեան հոգեւոր ճեմարանի օրհներգերը: Այնուհետեւ բացման խօսքով հանդէս եկաւ Գեւորգեան հոգեւոր ճեմարանի տեսուչ հոգեշնորհ Տ. Գարեգին վարդապետ Համբարձումեանը:   

Խօսքն ուղղելով շրջանաւարտներին` տեսուչ Հայր Սուրբն ասաց. «Շատ յաճախ մենք մոռանում ենք երազի զօրութեան մասին եւ այն մեծ ազդեցութեան մասին, որ երազը կարող է ունենալ մեր կեանքի եւ այլոց վրայ: Ամէն մի ճեմարանականի երազն է լինում աւարտել ճեմարանը եւ կոչուել ծառայութեան: Ահա այսօր Ձեր այդ երազն իրականացուած է: Դուք այնպիսի կրթութիւն էք ստացել այստեղ, որը ձեզ այսօր հնարաւորութիւն է ընձեռում ձեր ծառայութիւնը բերելու մեր Եկեղեցու ամենատարբեր կառոյցներից ներս: Վստահ ենք, որ պիտի շարունակէք կերտել ձեր լուսաւոր ապագան այն ամուր հիմքի վրայ, որ ստացել էք այստեղ: 

Բոլորս գիտենք, որ այսօր մեր առաքելութիւնն աւելի քան մեծ է մեր հայրենիքում եւ սփիւռքում: Երբ մենք նայում ենք մեր շուրջը, տեսնում ենք բազմաթիւ խնդիրներ, անբարոյ վարքի տարածում հասարակութեան մէջ, քանդուած ընտանիքներ, ցասում եւ ատելութիւն… Շատերը կորցրել են իրենց հոգեւոր անդորրը, ոմանք անգամ իրենց հաւատքն առ Աստուած եւ կամքի զօրութիւնն` անելու արդարն ու ճշմարիտը: Այսօր մենք մեր ծառայութեան միջոցով կոչուած ենք մարդկանց փոխանցելու Տիրոջ պատգամը յոյսի, Նրա յորդորը խաղաղութեան եւ Նրա կամքը ապաշխարութեան:

Հոգեւոր մեր ճեմարանը կրում է Ս. Գեւորգի անունը, ժամանակ կար, որ այն կոչւում էր Սուրբ Գեւորգեան ճեմարան: Թերեւս հաւատքի վկայութեան աւելի մեծ օրինակ դժուար պիտի լինէր մեզ գտնելու, քան Ս. Գեւորգի օրինակը, ով քրիստոնեայի կոչումն իր համար դարձրել էր անուն եւ Աստուծոյ ծառայութիւնը` անկոտրուն առաքելութիւն»: 

Հայր Գարեգինը ճեմարանի տեսչութեան, դասախօսական կազմի եւ ուսանողութեան անունից շնորհաւորեց տասնութ շրջանաւարտ սարկաւագներին` մաղթելով, որ Վեհափառ Հայրապետի ձեռքից ստացուելիք իրենց դիպլոմները հոգեւոր ու ինքնակրթական նոր ճամփորդութեան խթան դառնան:

Հաւարտ Հայր Սուրբի խօսքի ճեմարանի երգչախումբը ՀՀ արուեստի վաստակաւոր գործիչ Յարութիւն Թօփիկեանի ղեկավարութեամբ կատարեց Ս. Գեւորգ զօրավարին նուիրուած շարականը:

Այնուհետեւ Գեւորգեան հոգեւոր ճեմարանի դասախօսների անունից խօսքով հանդէս եկան Արժանապատիւ Տ. Ղեւոնդ աւագ քահանայ Մայիլեանը եւ բ. գ. թ. Նորայր Պողոսեանը:

Այնուհետեւ Գարեգին Բ Ամենայն Հայոց Կաթողիկոսի կողմից 2015-2016 թթ. ուսումնական տարուայ 18 շրջանաւարտներին յանձնուեցին աւարտական դիպլոմները:

Շրջանաւարտների անունից ներկաներին իր երախտագիտութեան խօսքն ուղղեց Բարեշնորհ Սամուէլ սարկաւագ Պողոսեանը:

Ցերեկոյթի ընթացքում գեղարուեստական կատարումներով հանդէս եկաւ «Ինռոք» լարային հնգեակը, որից յետոյ հանդիսութիւնն եզրափակուեց Նորին Սրբութեան պատգամով եւ օրհնութեամբ: 

«Տարիներ առաջ հաստատեցինք, որ Ս. Գեւորգ զօրավարի տօնը նշուի մեր հաստատութեան հարկի ներքոյ, իբրեւ Գեւորգեան հոգեւոր ճեմարանի հիմնադրութեան օր: Ս. Գեւորգ զօրավարի անուամբ է կոչուել այս հաստատութիւնը Երջանկայիշատակ Գեւորգ Դ Հայրապետի կողմից: Այսօր մենք փառք եւ գոհութիւն ենք առ Աստուած բարձրացնում, որ այս հաստատութիւնը արդէն 142 տարի իր առաքելութիւնն է իրականացնում ազգային մեր կեանքում: 142 տարի այն իր հարկից դուրս է բերել լուսամիտ ազգային գործիչներ, ովքեր իրենց  ծառայութիւնն են բերել մեր ժողովրդին թէ՛ աշխարհիկ եւ թէ՛ հոգեւոր հանգամանքի մէջ: …Փառահեղ անձինք, որ իրենց լուսաւոր հետքն են թողել ազգային մեր պատմութեան մէջ` իրենց վաստակով ու ինքնատիպ դրոշմով: Այսօր այդ աւանդոյթը շարունակւում է. մեր առջեւ նստած են 18 նոր շրջանվարտներ», - ասաց Վեհափառ Հայրապետը:

Այս առիթով Գարեգին Բ Կաթողիկոսն իր գնահատանքը յայտնեց ճեմարանի տեսչութեանը եւ դասախօսներին իրենց նուիրեալ ջանքերի եւ պտղաբեր աշխատանքի համար:

Շրջանաւարտներին Ամենայն Հայոց Կաթողիկոսը պատգամեց լինել Տիրոջ այգու արժանաւոր մշակներ եւ այլեւս հոգատարել իրենց խնամքին յանձնուող այգեստանը, որպէսզի բարեբեր պտուղներ պարգեւի: Նորին Սրբութիւնը յորդորեց, նոյն փառաւոր աւանդների կրողը լինելով, նոր փայլ եւ պայծառութիւն յաւելել ճեմարանի դարաւոր պատմութեանը եւ իրենց անձերի մէջ փառաւորել հոգեւոր հաստատութեան անունը:

Նշելով, որ երիտասարդ եկեղեցականները, իբրեւ Առաքելական Ս. Եկեղեցու սպասաւորներ, դժուարին առաքելութիւն են ստանձնում` Նորին Սրբութիւնը Երկնաւորի զօրակցութիւնը հայցեց նրանց համար` բարի ծառայութիւն իրականացնելու եւ միշտ բարձր պահելու Հայոց Եկեղեցու հեղինակութիւնը հայոց կեանքում: Ամենայն Հայոց Կաթողիկոսը պատգամեց զօրանալ Տիրոջով, հաւատքի մէջ ամուր եւ նուիրումով իրականացնել իրենց ծառայութիւնը Եկեղեցու լուսաւոր անդաստանից ներս:

Հանդիսութիւնը փակուեց Ամենայն Հայոց Կաթողիկոսի «Պահպանիչ» աղօթքով եւ Հայրապետական մաղթերգով:

 

  -   Մամլո հաղորդագրություն