Լոյս է տեսել «Սուրբ Հայրերի վարքն ու կենցաղավարութիւնը» ժողովածուի առաջին հատորը
18-11-2016 18:26:11 | | Նոր գրքեր
Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի օրհնութեամբ Մայր Աթոռ Սուրբ Էջմիածնի Հրատարակչական բաժինը լոյս է ընծայել «Սուրբ Հայրերի վարքն ու կենցաղավարութիւնը» ժողովածուի առաջին հատորը:
Ժողովածուի ներկայ աշխարհաբար թարգմանութիւնն իրականացուել է միայն ժողովածուի՝ «Վարք սրբոց հարանց եւ քաղաքավարութիւնք նոցին ըստ կրկին թարգմանութեան նախնեաց»-ի (Վենետիկ, 1855) կորիզը կազմող «Բանք եւ պատմութիւնք հարանց» հատուածի համար: Թարգմանութիւնը կատարուել է Հրատարակչական բաժնի տնօրէն Հոգեշնորհ Տ. Շահէ ծայրագոյն վարդապետ Անանեանի, Սիրանոյշ (Նանայ) Գրիգորեանի եւ Վաղարշակ Թանգամեանի կողմից:
19 գլուխներում ամփոփուած վանական-անապատական բարոյախօսութիւնը իւրայատուկ թեմատիկ ուղեցոյց է բոլոր նրանց համար, ովքեր փափագում են անապատական հայրերի հոգեւոր փորձառութեանը ծանօթանալու եւ դրանք առօրեայ կեանքում իբրեւ լուսաբանող օրինակներ ունենալու:
Իւրաքանչիւր գլխում կատարուել են համապատասխան պարբերութիւնների թուաբաժանումներ՝ ընթերցանութիւնն աւելի դիւրացնելու համար: Թարգմանուել են թէ առաջին, թէ երկրորդ թարգմանութեան բնագրերը, ինչպէս նաեւ՝ երկրորդ թարգմանութեան «մնացորդք»-ը՝ իբրեւ «Պահպանուած հատուածներ երկրորդ թարգմանութիւնից»: Թարգմանիչների բուն նպատակն է եղել ընթերցողին հասանելի դարձնել գրաբար թարգմանութեամբ մեզ հասած այս ժողովածուի բոլոր հատուածները:
Գիրքը հրատարակուել է «Սարգիս Գաբրիէլեան» հիմնադրամի մեկենասութեամբ:
Հրատարակչական բաժնի կողմից հրատարակուել է նաեւ 2017 թուականի սեղանի օրացոյցը: Ամենօրեայ ժամատախտակներին զուգահեռ այն բացատրութիւններ է տալիս բոլոր տօների եւ սրբոց յիշատակութեան օրերի վերաբերեալ:
ԴԱՍ. ՀԱՅԵՐԵՆ 
Հայերեն
Русский
English
French
