Նոյեմբերի 30-ին ոստիկանութեան պետ, գեներալ-լեյտենանտ Վլադիմիր Գասպարեանը, ոստիկանութեան զօրքերի հրամանատար Լեւոն Երանոսեանի եւ այլ բարձաստիճան սպաների ուղեկցութեամբ, այցելեց ոստիկանութեան զօրքերի հասարակական կարգի պահպանութեան գունդ:

 

Անձնակազմին շարահրապարակում ողջունելուց յետոյ Վլադիմիր Գասպարեանը ծաղկեպսակ եւ ծաղիկներ դրեց ծառայողական պարտականութիւնները կատարելիս եւ հայրենիքի սահմանների պաշտպանութեան ժամանակ զոհուած զինծառայողների յուշապատին:

Այնուհետեւ զինծառայողները ձեռնամարտի եւ յատուկ պատրաստութեան հնարքների ցուցադրական վարժանք ներկայացրին, ինչից յետոյ Վլադիմիր Գասպարեանն ու նրան ուղեկցող անձինք շրջայց կատարեցին զօրամասում:

Ոստիկանութեան պետը ծանօթացաւ նորաբաց օպերատիւ լսարանի հնարաւորութիւններին, որտեղ նրան վարժական մակետի վրայ ցուցադրուեցին ստորաբաժանման տակտիկական գործողութիւնները ու դրանց կառավարման ընթացքը:

Վլադիմիր Գասպարեանը ծանօթացաւ նաեւ զինծառայողների ստեղծած համակարգչային ծրագրին, որը բաղկացած է թեստային ու խաղարկային բաժիններից:

Ծրագրի միջոցով ստուգւում են անձնակազմի գիտելիքները, հմտութիւններն ու կարողութիւնները, գնահատւում է իւրաքանչիւր զինծառայողի պատրաստականութեան աստիճանը:

Հետաքրքիր էր նաեւ զինծառայողների պատրաստած սարքը, որի շնորհիւ էապէս բարձրանում է զինատեսակների սպասարկման եւ կիրարկման արդիւնաւէտութիւնը:

Ոստիկանութեան պետը ստուգեց նաեւ անձնակազմի պարապմունքների, մարզումների ու հանգստի պայմանները, ծանօթացաւ  հանդերձանքի ու մթերային ապահովման վիճակին, զօրամասի տեխնիկական հնարաւորութիւններին:

Շրջայցի աւարտին Վլադիմիր Գասպարեանը դրական գնահատեց կատարուած աշխատանքն ու զօրամասի պատրաստականութիւնը եւ արդիւնաւէտ ծառայութիւն մաղթեց ոստիկանութեան զօրքերի հասարակական կարգի պահպանութեան գնդի հրամանատարութեանն ու անձնակազմին: