Տիգրան Սարգսեան. «Հայաստանը կարեւորում է
համագործակցութիւնը FAO-ի հետ»
17-11-2009 19:24:00 | | Տնտեսութիւն
ՀՌՈՄ, 17 ՆՈՅԵՄԲԵՐԻ, ՆՈՅԵԱՆ ՏԱՊԱՆ: ՄԱԿ-ի Պարենի եւ
գիւղատնտեսութեան կազմակերպութեան (FAO) համաժողովին մասնակցելու
նպատակով Իտալիայում գտնուող Հայաստանի Հանրապետութեան վարչապետ
Տիգրան Սարգսեանը համաժողովում ունեցած իր ելոյթում յայտարարել է,
որ Հայաստանը պաշտպանում է պարենային ապահովութեան վերաբերեալ
գագաթաժողովի հռչակագիրը: Այն, ըստ Տ.Սարգսեյանի, համապատասխանում է
ՀՀ կառավարութեան տեսլականին, ու դրանում արտայայտուած սկզբունքները
Հայաստանի համար ընդունելի են: Նա նաեւ նշել է, որ հայկական կողմը
բարձր է գնահատում Պարենի եւ գիւղատնտեսութեան կազմակերպութեան
Գիւղատնտեսական հարցերով եւրոպական յանձնաժողովի 36-րդ նստաշրջանն
ու Կազմակերպութեան եւրոպական տարածաշրջանային 27-րդ կոնֆերանսը
2010 թուականի մայիսի 10-14-ին Երեւանում անցկացնելու մասին
որոշումը: ՀՀ վարչապետը հոյս է յայտնել, որ Երեւանում կայացրած
որոշումները եւս կնպաստեն պարենային անվտանգութեան մակարդակի զգալի
բարձրացմանը:
Այնուհետեւ տեղի է ունեցել ՀՀ վարչապետի ու ՄԱԿ-ի Պարենի ու
գիւղատնտեսութեան կազմակերպութեան գլխաւոր տնօրէն, դոկտոր Ժակ
Դիուֆի հանդիպումը, որի ընթացքում կողմերը քննարկել են Հայաստանի
ու կազմակերպութեան միջեւ համագործակցութեան հարցերը: ՀՀ վարչապետը
նշել է, որ Հայաստանը կարեւորում է համագործակցութիւնը FAO-ի հետ,
ինչպէս նաեւ այդ կազմակերպութեան կողմից Հայաստանում իրականացրած
եւ ներկայումս իրականացyող ծրագրերը: Տ.Սարգսեանը յատուկ ընդգծել է
հացահատիկի, եգիպտացորենի ու կարտոֆիլի սերմնաբուծութեան,
ձկնաբուծութեան, գիւղատնտեսական կենդանիների հաշուառման եւ
համարակալման համակարգի ստեղծման, գիւղատնտեսական ապահովագրական
համակարգի ներդրման ոլորտներում համագործակցութեան զարգացումը:
Ինչպէս «ՆՈՅԵԱՆ ՏԱՊԱՆ»-ին յայտնեցին ՀՀ կառավարութեան
Տեղեկատուութեան եւ հասարակայնութեան հետ կապերի վարչութիւնից,
նոյեմբերի 17-ի ուշ երեկոյեան Տ.Սարգսեյանի գլխաւորած
պատուիրակութիւնը կվերադառնայ Երեւան: