Մայիսի սկզբին նախատեսւում է JICA-ի առաքելութեան այցը
Հայաստան
19-03-2009 17:00:00 | Հայաստան | Տնտեսութիւն
ԵՐԵՎԱՆ, 19 ՄԱՐՏԻ, ՆՈՅԵԱՆ ՏԱՊԱՆ: Հայաստանի տրանսպորտի եւ
կապի նախարար Գուրգէն Սարգսեանը մարտի 18-ին ընդունել է Ճապոնիայի
միջազգային համագործակցութեան գործակալութեան (JICA) Կենտրոնական
Ասիայի եւ Կովկասի բաժնի պետ Կենիչի Յամատոտոյին: Կարեւորելով
գործակալութեան հետ սերտ համագործակցութիւնը, նախարարը նշել է, որ
այն կնպաստի Հայաստանի տնտեսութեան զարգացմանը: Անդրադառնալով
գործակալութեան կողմից Հայաստանի գիւղական ճանապարհների
վերանորոգմանն ուղղուած նոր վարկային ծրագրի կազմման գործընթացին,
Գ.Սարգսեանը տեղեկացրել է, որ այն արդէն աւարտական փուլում է, եւ
առաջիկայում փաստաթղթերը վերջնական տեսքի կբերուեն:
JICA-ի ներկայացուցիչը մանրամասն ներկայացնելով գիւղական
ճանապարհների վերանորոգման վարկային ծրագիրը, նշել է, որ այն
կկազմի մօտ 50-100 մլն ԱՄՆ դոլար եւ կտրամադրուի արտօնեալ
պայմաններով: Ըստ նրա, մայիսի սկզբին նախատեսւում է JICA-ի
առաքելութեան այցը Հայաստան, որի ընթացքում մանրամասն կքննարկուեն
վարկային համաձայնագրի պայմանները, ֆինանսաւորման կոնկրետ չափը եւ
ժամկէտները: Կ.Յամատոտոն հաւաստիացրել է, որ երկկողմ
բանակցութիւնների յաջող ընթացքի դէպքում վարկային համաձայնագիրը
Հայաստանի հետ մինչեւ տարեվերջ կստորագրուի:
Ըստ ՀՀ տրանսպորտի եւ կապի նախարարի մամուլի քարտուղար
Սուսաննա Տոնոյանի, հանդիպման ընթացքում կողմերը անդրադարձել են
նաեւ ճանապարհների պահպանութեան խնդրին, որի լուծման համար
հնարաւոր է նաեւ JICA-ի ֆինանսական եւ տեխնիկական աջակցութիւնը: