ՀՀ վարչապետը եւ Օրենբուրգի նահանգապետը քննարկել են
փոխգործակցութեան խորացման հարցեր
20-05-2010 21:30:00 | Հայաստան | Տնտեսութիւն
ԵՐԵՎԱՆ, 20 ՄԱՅԻՍԻ, ՆՈՅԵԱՆ ՏԱՊԱՆ-ՀԱՅԵՐՆ ԱՅՍՕՐ: ՀՀ վարչապետ
Տիգրան Սարգսեանը մայիսի 20-ին ընդունել է Օրենբուրգի մարզի
նահանգապետ Ալեքսեյ Չեռնիշեւի գլխաւորած պատուիրակութեանը:
Կառավարութեան ղեկավարը բարձր է գնահատել հայ-ռուսական
ռազմավարական փոխշահավետ համագործակցութիւնը: ինչպէս տեղեկացրեցին
ՀՀ կառավարութիւնից, Տիգրան Սարգսեյանի եւ Ալեքսեյ Չեռնիշեւի
հանդիպման ընթացքում քննարկուել են Հայաստանի Հանրապետութեան
մարզերի եւ Ռուսաստանի Դաշնութեան սուբյեկտների միջեւ
փոխգործակցութեան յետագայ խորացման մանրամասներ: Ընդգծելով
տնտեսական ոլորտում առկայ ներուժի լիարժէք իրացման
անհրաժեշտութիւնը` զրուցակիցները խօսել են ապրանքաշրջանառութեան
ծաւալների մեծացման անհրաժեշտութիւնից: Հեռանկարային է համարուել
գիւղատնտեսութեան, սերմնաբուծութեան, մեքենաշինութեան,
առողջապահութեան ոլորտներում սերտ կապերի հաստատումը: Ալեքսեյ
Չեռնիշեւը բարձր է գնահատել Օրենբուրգի նահանգի հայ համայնքի
ունեցած կարեւոր դերը մարզի զարգացման գործում: Առանձնակի
ուշադրութեան է արժանացել անցեալ տարի Օրենբուրգում բացուած
Հայկական ազգային տան գործունէութիւնը: Նշուվել է, որ մարզում առկայ
մեծաթիւ հայկական սփիւռքի մասնակցութիւնը համատեղ ծրագրերում
կխթանի միջմարզային համագործակցութիւնը: Վարչապետ Տիգրան
Սարգսեանը կարեւորել է գործարար շփումների ակտիւացումը բիզնեսի
ներկայացուցիչների միջեւ ուղղակի կապերի ստեղծումը, ինչը
հնարաւորութիւն կտայ աւելի սերտացնել տնտեսական
յարաբերութիւնները:
ԴԱՍ. ՀԱՅԵՐԵՆ 
Հայերեն
Русский
English
French