Ամփոփուեցին «Հայ ինքնութեան որակների պահպանումը
խառնամուսնություններում» գիտագործնական համաժողովի առաջին նիստի
արդիւնքները
25-04-2010 16:00:00 | Հայաստան | Հասարակութիւն
ԵՐԵՎԱՆ, 25 ԱՊՐԻԼԻ, ՆՈՅԵԱՆ ՏԱՊԱՆ-ՀԱՅԵՐՆ ԱՅՍՕՐ: ՀՀ սփիւռքի
նախարարութեան նախաձեռնութեամբ կազմակերպուած «Հայ ինքնութեան
որակների պահպանումը խառնամուսնություններում» գիտագործնական
համաժողովի ապրիլի 25-ի առաջին նիստը նախագահում էր ՀՀ ԳԱԱ
պատմութեան ինստիտուտի տնօրէն, պատմական գիտութիւնների դոկտոր,
պրոֆեսոր, ՀՀ ԳԱԱ թղթակից անդամ Աշոտ Մելքոնեանը:
Ողջունելով համաժողովի մասնակիցներին` Ա.Մելքոնեանը խօսեց
ինքնութեան ձեւաւորման հարցում միջավայրի ազդեցութեան մասին: Նա
անթոյլատրելի համարեց խառնամուսնությունների հետեւանքով հայ
ինքնութեան որակների պահպանման գործընթացը վտանգի տակ դնելը:
«Խառնամուսնությունները եւ ազգային ինքնութիւնը Հայ
Սփիւռքում. հայեացք Երեւանից» թեմայով զեկույցով հանդէս եկաւ ՀՀ ԳԱԱ
պատմութեան ինստիտուտի աշխատակից, պատմական գիտութիւնների դոկտոր
Էդուարդ Մելքոնեանը: Նա ներկայացրեց վիճակագրական տվյալներ
ԽՍՀՄ-ում, ԱՄՆ-ում, Կանադայում եւ եւրոպական մի շարք երկրներում
հայերի խառնամուսնությունների թուի վերաբերեալ:
Զեկուցողը անհանգստացնող համարեց յատկապէս այն փաստը, որ
խառնամուսնությունները նպաստում են էթնոմշակութային ձուլման
գործընթացին:
«Խառնամուսնությունները` որպէս սոցիալ-մշակոյթային
երեւոյթ եւ դրանց ուսումնասիրութեան ազգաբանական առումները» թեմայով
զեկուցեց պատմական գիտութիւնների թեկնածու, ԵՊՀ-ի եւ ՀՀ ԳԱԱ
հնագիտութեան եւ ազգագրութեան ինստիտուտի աշխատակից Մխիթար
Գաբրիէլեանը: Նա դիտարկելով երեւոյթը ազգաբանական առումով`
կարեւորեց յստակ վիճակագրական տվյալներ ունենալու, ընդհանուր
քարտեզագրում կատարելու անհրաժեշտութիւնը: Զեկուցողը վտանգաւոր համարեց
նոր էթնիկ միջավայրին ինտեգրուելու, ադապտացիոն գործընթացներն
արագացնելու նկատառումով հայ երիտասարդների, յատկապէս Հայաստանից
վերջին շրջանում հեռացած, հրաժարումը ազգային-մշակոյթային
արժէքներից:
«Սփիւռքահայ խառնամուսնական ընտանիքները
1946-1948թթ. ներգաղթի տարիներին» թեմայով զեկույցով հանդէս եկաւ
պատմական գիտութիւնների թեկնածու, ՀՀ ԳԱԱ հնագիտութեան եւ
ազգագրութեան ինստիտուտի աշխատակից Արմէնուհի Ստեփանեանը: Նա
անդրադարձաւ Հայաստանում ներգաղթեալ խառնամուսնական ընտանիքների
ինտեգրման խնդիրներին, որոնք ի յայտ էին եկել լիովին իրար հակասող
միջավայրերում ապրող արեւմտահայերի եւ արեւելահայերի միջեւ առաջացած
տարբերութիւնների հետեւանքով:
Խորհրդաժողովի առաջին նիստի զեկույցների մասը եզրափակեց
պատմական գիտութիւնների դոկտոր, ՀՀ ԳԱԱ հնագիտութեան եւ
ազգագրութեան ինստիտուտի աշխատակից Լիլիա Վարդանեանը` «Որոշ
դիտարկումներ Լոս-Անջելէսի հայ համայնքի խառնամուսնությունների
վերաբերեալ» թեմայով զեկուցմամբ: Նա անդրադարձաւ այն խնդրին, որ
Լոս-Անջելէսի հայկական համայնքում գոյութիւն ունի խիստ
տարբերակում` «հայաստանցի հայ», «պարսկահայ» եւ «ախպար»: Տիկին
Վարդանեանը կարեւորեց այն փաստը, որ տեղի հայերը, ձգտելով արագ
ինտեգրուել բնակութեան երկրի հասարակութեանը, միջավայրին,
միաժամանակ ամէն կերպ փորձում են պահպանել իրենց հայկական
ինքնութիւնը:
Նիստի աւարտին ծաւալուեց քննարկում, որին ակտիւօրէն
մասնակցում էին նաեւ համաժողովի մասնակից սփյուռքահայերը:
Ամփոփելով առաջին նիստի արդիւնքները` նախագահող Ա.Մելքոնեանը
անհրաժեշտ համարեց վերականգնել նախկինում գերիշխող այն
մտածելակերպը, որ «հայի հետ ամուսնութիւնը` ամուր եւ առողջ
ընտանիք ունենալու ամենաառաջին երաշխիքն է»: