Երեւանի թիւ 62 դպրոցում Հայոց Մեծ Եղեռնի 95-տարելիցին
նուիրուած յատուկ դասը վարել են երեք նախարարներ
21-04-2010 19:32:00 | Հայաստան | Հասարակութիւն
ԵՐԵՎԱՆ, 21 ԱՊՐԻԼԻ, ՆՈՅԵԱՆ ՏԱՊԱՆ: ՀՀ Կրթութեան եւ գիտութեան
նախարարութեան, Երեւանի քաղաքապետարանի եւ Հայոց ցեղասպանութեան
ինստիտուտ-թանգարանի նախաձեռնութեամբ ապրիլի 21-ին Երեւանի թիւ 62
դպրոցում կազմակերպուել էր յատուկ դաս` նուիրուած Հայոց Մեծ Եղեռնի
95-տարելիցին: 10-րդ դասարանի աշակերտների համար յատուկ դասը վարել
են ՀՀ կրթութեան եւ գիտութեան նախարար Արմէն Աշոտեանը, ՀՀ սփիւռքի
նախարար Հրանուշ Յակոբեանը եւ ՀՀ մշակոյթի նախարար Յասմիկ
Պողոսեանը:
Ինչպէս «ՆՏ»-ին յայտնեցին ՀՀ Կրթութեան եւ գիտութեան
նախարարութեան Մամուլի ծառայութիւնից, յատուկ դասի շրջանակում նախ
ցուցադրվել է «Հոգիների աճուրդ» ֆիլմը: Այն հայերի ցեղասպանութեան
վերաբերեալ նկարահանուած առաջին գեղարուեստական կինոնկարն է` Մեծ
Եղեռնը վերապրած մանկահասակ մի հայ աղջկա` Արշալոյս (գրքում`
Ավրորա) Մարտիկանյանի, անմիջական մասնակցութեամբ:
Ֆիլմը նկարահանուել է 1918թ.-ին Կալիֆորնիայում, ամերիկեան
«Մետրո Գոլդվին Մեյեր» կինոընկերությունում, ռեժիսոր Օսկար Ափֆելի
կողմից անմիջապէս ցեղասպանությունից յետոյ` Նյու Յորքում անգլերէն
լեզւով լոյս տեսած Հայոց ցեղասպանութեան ականատեսի առաջին
փաստավավերագրական յուշագրութիւններից մէկի` «Հոշոտված Հայաստան»
խորագիրը կրող գրքի հիման վրայ: «Հոգիների աճուրդ» համր ֆիլմի
(շուրջ 10 հազար անձանց, այդ թւում եւ հայ բռնագաղթուածների 200
երեխաների մասնակցութեամբ) ամբողջ հասոյթը տրամադրվել է Մերձաւոր
Արեւելքում հաւաքուած 60 հազար հայ որբերի կենսաապահովմանը:
«Հոգիների աճուրդ» ֆիլմն առաջին անգամ ցուցադրվել է 1919թ.-ի
փետրուարի 16-ին Նյու Յորքում: Ընդհանուր առմամբ, ֆիլմը ցուցադրվել
է ԱՄՆ 23 նահանգների մեծ քաղաքներում, Լատինական Ամերիկայի մի շարք
երկրներում, Մեծ Բրիտանիայում եւ ամէնուր բացառիկ յաջողութիւններ
է ունեցել: Յետագայում ֆիլմն անհետացել է, եւ աւելի քան ութսուն
տարի կինոպատմաբաններն անարդիւնք փնտրել են «Հոգիների աճուրդ»
ֆիլմի 9 մասերը: Ֆիլմի ամբողջական տարբերակը` 85 րոպե
տեւողությամբ, այսօր չի պահպանուել, եւ միայն 1994թ.-ին
արգենտինահայ Էդուարդ Գոզանլյանի ջանքերով յայտնաբերուել է
ժապաւէնից մի հատուած, որի մի օրինակը պահւում է Հայոց
ցեղասպանութեան թանգարան-ինստիտուտի ֆոնդերում:
Աշակերտների հետ Ֆիլմը դիտելուց յետոյ նախարարները տարբեր
դասարաններում յատուկ դաս են վարել Ցեղասպանութեան, ինչպէս նաեւ
պետութեան եւ հայրենասիրութեան գաղափարների շուրջ: