Հայաստանում լուրջ քայլեր են ձեռնարկւում կեղծ դեղերի
շրջանառութեան դէմ
07-04-2010 15:50:00 | Հայաստան | Հասարակութիւն
ԵՐԵՎԱՆ, 7 ԱՊՐԻԼԻ, ՆՈՅԵԱՆ ՏԱՊԱՆ: Ոչ պաշտօնական տուեալների
համաձայն Հայաստանում կեղծ դեղերի շրջանառութիւնը կազմում է
10-12%: Այս մասին ապրիլի 7-ի ասուլիսում յայտնեց ՀՀ
Առողջապահութեան նախարարութեան Դեղերի փոձագիտական կենտրոնի տնօրէն
Էմիլ Գաբրիէլեանը:
Ըստ նրա, կեղծ դեղերի շրջանառութիւնը «լուրջ բիզնես է», որի
դէմ պայքարելու համար պէտք է զգալի աշխատանքներ իրականացուեն, եւ
Հայաստանում այդ ուղղութեամբ լուրջ քայլեր են ձեռնարկւում:
«Հանրապետութիւնում դեղերի պիտանիութեան ստուգման գործընթացը
վերահսկւում եւ կանօնակարգւում է: Դեղը սովորական առարկայ չէ,
այստեղ գործ ունենք մարդու կեանքի եւ առողջութեան հետ, այդ իսկ
պատճառով բոլոր հնարաւոր միջոցները ձեռնարկւում են»,- նշեց նա:
Է.Գաբրիէլեանի խօսքերով, անհրաժեշտ է պարբերաբար եւ առանց
զգուշացնելու մշտադիտարկում իրականացնել հանրապետութեան
դեղատներում:
Նշուեց, որ կեղծ դեղերը հանրապետութիւն են ներկրւում զարտուղի
ճանապարհով: Իսկ այն դեղերը, որոնք անցնում են կենտրոնի
«հսկողութեան խողովակներով», ենթարկվում են ուսումնասիրությունների
եւ հետազօտման: «Ստուգւում է ներկրւող դեղի որակը,
արդիւնաւէտութիւնը, անվտանգութիւնը, եւ դրական եզրակացությունից
յետոյ միայն դեղը կարող է մտնել Հայաստանի շուկայ»,- ասաց
Է.Գաբրիէլեանը:
Կենտրոնի տնօրէնը յայտնեց, որ ՀՀ Ազգային ժողով է է
ներկայացուել դեղերի մասին նոր օրէնքի նախագիծ, որով նախատեսուած է
կարգաւորել դեղերի շրջանառութեան ողջ գործընթացը:
Նշուեց նաեւ, որ հանրապետութիւնում տարուայ ընթացքում
շրջանառւում է 60-70 մլն դոլարի ներկրուած դեղ: Տեղական
արտադրութեան դեղերի ծաւալը շուկայում 5-7% է: