ԽԱՉԱՏՈՒՐ ՍՈՒՔԻԱՍՅԱՆԻ ԸՆՏԱՆԻՔԸ ԴԱԴԱՐԵՑՐԵԼ Է «ԲՋՆԻ» ՀԱՆՔԱՅԻՆ
ՋՐԵՐԻ ԳՈՐԾԱՐԱՆԻ ԱՇԽԱՏԱՆՔԸ ԵՎ ՊԱՅՔԱՐԵԼՈՒ Է ՎԱՐՉԱԿԱՆ ԴԱՏԱՐԱՆԻ ՎՃՌԻ
ԴԷՄ
28-10-2008 21:00:00 | Հայաստան | Տնտեսութիւն
ԵՐԵՎԱՆ, 28 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Մարտի 1-ին Երեւանում
տեղի ունեցած յայտնի դէպքերի հետ կապուած հետախուզման մէջ գտնուող ՀՀ
ԱԺ պատգամաւոր Խաչատուր Սուքիասյանի ընտանիքին պատկանող «Բջնի»
հանքային ջրերի գործարան» ՓԲԸ-ի ղեկավարութիւնը որոշում է
ընդունել «դադարեցնել արտադրութիւնը «յետագայ գործունէութեան
անհնարինութեան պատճառով»:
Ինչպէս տեղեկացնում են ՀՀ Արդարադատութեան նախարարութեան
Դատական ակտերի հարկադիր կատարումն ապահովող ծառայութիւնից,
հոկտեմբերի 17-ին ՀՀ ԿԱՅ պետական եկամուտների կոմիտէից ստացուել է
կատարողական թերթ «Բջնի» հանքային ջրերի գործարան» ՓԲԸ-ից,
համաձայն ՀՀ վարչական դատարանի կայացրած վճռի եզրափակիչ մասի,
յօգուտ պետական բիւջէի 4 միլիարդ 67 միլիոն 201 հազար 600 դրամ
(աւելի քանի 13 միլիոն դոլար) բռնագանձելու պահանջով: Հոկտեմբերի
21-ն ԴԱՀԿԱԾ աշխատակիցները այցելել են «Բջնի» գործարան, կատարել
գոյքագրում եւ արգելանք դրել անշարժ գոյքի վրայ: Ըստ նոյն
աղբիւրի, «գործողութիւնը բխել է օրենքներից եւ նպատակ է ունեցել
ընդամէնը անհնարին դարձնել գոյքի հնարաւոր օտարումը»:
Ինչպէս «ՆՈՅԵԱՆ ՏԱՊԱՆ»-ին յայտնեց Սուքիասյանների ընտանիքին
պատկանող «Սիլ կոնցերնի» մամուլի քարտուղար Աննա Մկրտչեանը, իրենք
«օրինական բոլոր մեթոդներով պայքարելու են վճռի եւ գործընթացի
դէմ»:
Յիշեցնենք, որ անցած տարուայ սեպտեմբերի 21-ին ԱԺ պատգամաւոր
Խաչատուր Սուքիասեանը յայտարարեց ՀՀ առաջին նախագահ Լեւոն
Տեր-Պետրոսեանին իր զորակցության մասին: Մէկ ամիս անց Հարկային
պետական ծառայութեան կողմից ստուգումներ սկսուեցին «Բջնի»
գործարանում, որոնց արդիւնքում արձանագրուեց, որ ջրաչափը, որով
չափւում է արտադրութեան համար ձեռնարկութեան օգտագործած հանքային
ջրի ծաւալը, սխալ է դրուած: Ըստ մամուլում զետեղուած
տեղեկութիւնների, ջրաչափը կապարակնքված է եղել ՀՀ Բնապահպանութեան
նախարարութեան տեսուչի կողմից, եւ 2005-06թթ.-ին իրականացուած
ստուգումներով արձանագրուել է, որ այդ ջրաչափի մասով որեւէ խախտում
չկայ: Սակայն այս տարուայ ստուգման արդիւնքում արձանագրուեց, որ
խախտումներ կան: