ԵՐԵՒԱՆՈՒՄ ՄԵՆԱՀԱՄԵՐԳՈՎ ՀԱՆԴԷՍ ԿԳԱՅ ՖՐԱՆՍԱԲՆԱԿ ՀԱՆՐԱՅԱՅՏ
ԴԱՇՆԱԿԱՀԱՐ ՎԱՐԴԱՆ ՄԱՄԻԿՈՆԵԱՆԸ
10-10-2008 19:35:00 | Հայաստան | Մշակոյթ
ԵՐԵՎԱՆ, 10 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Երեւանում անցկացուող
«Վերադարձ» խորագրով դասական երաժշտութեան երկրորդ փառատոնի
շրջանակներում հոկտեմբերի 11-ին «Արամ Խաչատրեան» համերգասրահում
կկայանայ ֆրանսաբնակ հանրայայտ դաշնակահար Վարդան Մամիկոնեանի
մենահամերգը: Հոկտեմբերի 12-ին դաշնակահարը բարեգործական համերգով
հանդէս կգայ նաեւ Գիւմրիում:
Ինչպէս հոկտեմբերի 10-ի ասուլիսում յայտնեց ԽՍՀՄ ժողովրդական
արտիստ Էդուարդ Միրզոեանը, Վ.Մամիկոնեանը երաժշտական կեանքում
երեւոյթ է: «Նա յայտնի ջութակահար Լեւոն Մամիկոնեանի որդին է, եւ
ուրախ եմ, որ այսօր հոր գործը շարունակում է որդին` աշխարհին
ներկայացնելով հայկական դասական արուեստի նմուշները»,- նշեց
կոմպոզիտորը:
Վ.Մամիկոնեանի խօսքերով, ինքը «Արամ Խաչատրեան»
համերգասրահում առաջին անգամն է մենահամերգով ելոյթ ունենալու,
ինչը պարտաւորեցնող է: Երիտասարդ դաշնակահարի խօսքերով, ի
տարբերութիւն այլ երկրների, Հայաստանում երիտասարդները
հետաքրքրւում են դասական երաժշտությամբ: «Դա բացառիկ երեւոյթ է,
քանի որ ես որեւէ երկրում նման հետաքրքրվածություն չեմ նկատել: Ես
վստահ եմ, որ դա գալիս է մեր դաստիրակությունից, եւ յուսով եմ, որ
այդ երեւոյթը շարունակական կլինի»,- ընդգծեց դաշնակահարը: Նա
միաժամանակ նշեց, որ հայկական դասական երաժշտութիւնը միշտ էլ
հետաքրքրութիւն է առաջացնում օտարազգիների մօտ, յատկապէս
Կոմիտասի, Աւետ Տերտերյանի եւ Տիգրան Մանսուրյանի
ստեղծագործությունները:
Վ.Մամիկոնեանը սովորել է Մոսկուայի Պ.Չայկովսկու անուան
կոնսերվատորիայում: Նա մասնակցել է բազմաթիւ միջազգային
փառատոների, արժանացել Մոնտե Կառլոյում անցկացուող Աշխարհի
երաժշտութեան վարպետների մրցոյթի առաջին մրցանակին,
մենահամերգներով հանդէս եկել աշխարհի յայտնի բեմերում: