ԸՍՏ ՀՏՖ-Ի «ՀԱՄԱՇԽԱՐՀԱՅԻՆ ԱՌԵՎՏՐԻ ԽԹԱՆՄԱՆ ԶԵԿՈՅՑ. 2008»-Ի,
ՀԱՅԱՍՏԱՆԸ ԱՌԵՎՏՐԻ ԽԹԱՆՄԱՆ ՀԱՄԱԹՎՈՎ ԱՌԱՋԻՆՆ է ԱՊՀ-ՈՒՄ
17-06-2008 21:00:00 | Հայաստան | Տնտեսութիւն
ԵՐԵՎԱՆ, 17 ՅՈՒՆԻՍԻ, ՆՈՅԵԱՆ ՏԱՊԱՆ: Ըստ Համաշխարհային
տնտեսական ֆորումի (ՀՏՖ) «Համաշխարհային առեւտրի խթանման զեկոյց.
2008»-ի, Հայաստանը առեւտրի խթանման մակարդակի համաթվով 118
երկրների մէջ զբաղեցնում է 61-րդ տեղը` գրաւելով առաջին տեղը ԱՊՀ
երկրների միջեւ եւ գերազանցելով Ուկրաինայի (68), Ադրբեջանի (78)
եւ Ռուսաստանի (103) ցուցանիշները: Ինչպէս «ՆՈՅԵԱՆ ՏԱՊԱՆ»-ին
յայտնեցին ՀՏՖ-ի Համաշխարհային մրցունակութեան ցանցի հայաստանեան
գործընկեր «Տնտեսութիւն եւ արժէքներ» հետազոտական կենտրոնից,
ՀՏՖ-ի կողմից առաջին անգամ հրատարակուած զեկոյցը վերլուծում է
երկրների միջեւ ապրանքների ազատ հոսքերի հիմքում ընկած գործօնների
արդիւնաւէտութիւնն ապահովելու պայմաններն ուսումնասիրուած
երկրներում:
Ըստ Զեկոյցի շուկայի մուտքի ազատութեան ենթահամաթվի, որով
Հայաստանը զբաղեցնում է 43-րդ տեղը, երկրում իրականացyող տնտեսական
քաղաքականութիւնը բաւականաչափ խթանում է օտարերկրեայ արտադրանքի
ներհոսքը երկիր: Միւս կողմից, յատկապէս անբարենպաստ է
սահմաններում կարգաւորման ազդեցութիւնը առեւտրի վրայ (87-րդ տեղ):
Տրանսպորտի եւ հեռահաղորդակցության ենթակառուցվածքը բնութագրող
ենթահամաթվով Հայաստանը 77-րդն է, իսկ ոլորտի գործարար միջավայրի
համաթվով` 53-րդը: Ըստ ենթահամաթվերի բնութագրիչ առանձին 10
հենասյուների, միջազգային առեւտուրը պայմանաւորող գործօններից
Հայաստանում յատկապէս արդիւնաւէտ են տարիֆային եւ ոչ տարիֆային
սահմանափակումները (14-րդ տեղ) եւ գործարար միջավայրը կարգաւորող
օրենսդրական դաշտը (47-րդ տեղ):
Համաձայն Զեկոյցի, ոլորտում Հայաստանի ցուցաբերած
արդիւնքներից առաւել խոցելի են մաքսային կարգաւորման
արդիւնաւէտութիւնը (103-րդ տեղ), սահմաններում կարգաւորող
մարմինների գործունէութեան թափանցիկությունը (92-րդ տեղ),
փոխադրամիջոցների առկայութիւնը եւ որակը (89-րդ տեղ), ինչպէս նաեւ
տեղեկատուական եւ հաղորդակցման միջոցների հասանելիութիւնը եւ որակը
(86-րդ տեղ):
Առեւտրի խթանման համաթվով համաշխարհային առաջատարներ են
Հոնկոնգը եւ Սինգապուրը, որոնք առաջատար դիրքեր են գրաւում
միջազգային առեւտրի բացությամբ եւ ներդրումներ ներգրաւելու
կարողութեամբ: