Հայաստանում ԵՄ-ի պատուիրակութիւնը կազմակերպում է
վերապատրաստման դասընթացներ հայաստանեան ՀԿ-ների համար
02-04-2010 18:18:00 | Հայաստան | Հասարակութիւն
ԵՐԵՎԱՆ, 2 ԱՊՐԻԼԻ, ՆՈՅԵԱՆ ՏԱՊԱՆ: Հայաստանում Եւրոպական
միութեան պատուիրակութիւնը մարտի 30-31-ին «ԵՄ-ի դրամաշնորհների
պայմանագրերին առնչուող ֆինանսական ընթացակարգերը Հայաստանում»
թեմայով վերապատրաստման 2 դասընթացներ է անցկացրել Երեւանոցում:
Դասընթացների նպատակն էր համապարփակ տեղեկութիւններ
տրամադրել ԵՄ դրամաշնորհների պայմանագրերին առնչուող ֆինանսական եւ
հաշուապահական հաշուառման հարցերի վերաբերեալ: Վերապատրաստման
դասընթացների շրջանակում ներկայացուել են հաշուապահական հաշուառման
լաւագոյն փորձի օրինակներ, Հայաստանի հարկային օրէնսդրութեան,
հաշուապահական հաշուառման չափանիշների եւ ԵՄ ֆինանսական
հաշուետւութեան պահանջների միջեւ առկայ փոխադարձ կապերը, ինչպէս նաեւ
ներքին հսկողութեան ընթացակարգերը:
«Գրանդ Թորնթոն Ամիօ» աուդիտորական ընկերութեան մատուցած
դասընթացներին մասնակցել են դրամաշնորհների պայմանագրերի բոլոր
շահառուներին ներկայացնող աւելի քան 40 ֆինանսական կառավարիչներ,
հաշուապահներ եւ ծրագրերի ղեկավարներ:
Ըստ «ՆՏ»-ին տրամադրած հաղորդագրութեան, հաշուի առնելով
դասընթացների մասնակիցների դրական արձագանքը, պատուիրակութիւնը
կդիտարկի ապագայում եւս դասընթացներ կազմակերպելու
նպատակահարմարությունը` շեշտադրելով հաշուապահական հաշուառման
պրակտիկան եւ հարկային հիմնախնդիրները: