Ծաղկազարդը (Ծառզարդար) Մեծ Պասի նախավերջին կիրակնօրեայ տոնն
Է (Զատկից մէկ շաբաթ առաջ), որի ակունքները գալիս են
նախաքրիստոնէական հեռաւոր ժամանակներից: Տոնի ծիսական
արարողութիւնների մեծ մասը նուիրուած է գարնան զարթոնքին, եւ,
պատահական չէ, որ այդ օրը եկեղեցում կարդացվող «Երգ երգոցի» մի
հատուածը ամբողջութեամբ բնութեան գովքն է անում. «Զի ահա ձմեռն անց,
անձրեւք անցին եւ գնացեալ մեկնեցան, ծաղիկք երեւեցան յերկրի
մերում...»:
Գարնանը բնութիւնն սկսում է ծաղկել, փթթել եւ արգասավորվել,
հետեւաբար, ծաղիկների առատութեան երեւալու հետ է կապուած տոնի
Ծաղկազարդ անուանումը: Միւս` ժողովրդական տարբերակը` Շառզարդար
(ծառով զարդարված կամ ծառը զարդարել), դարձեալ գարնան գալուստն է
խորհրդանշում, երբ, ի նշան դրա, մարդիկ ուռենու կամ ձիթենու
օրհնուած ճյուղերով զարդարում էին իրենց տունն ու բակը,
անասուններին: Յետոյ այդ ոստերը խնամքով պահում էին ու գործածում`
որպէս պահպանակ մրրիկի եւ փոթորկի ժամանակ, նաեւ այրում էին ու
մոխիրը քամուն տալիս` փորձանքից զերծ մնալու համար: Ժողովուրդը
օրհնուած ոստերի մէջ խորհրդաւոր մի ուժ էր տեսնում, որի միջոցով
կարող էր պաշտպանուել բնութեան արհավիրքներից, որոնք կարող էին
ոչնչացնել հունձքը, այգին, պտղատու ծառերը:
Անցեալում Ծաղկազարդի տոնին սովորություն էր եկեղեցում ծառ
զարդարելը, ինչպէս նաեւ նրա ճիւղերից պտուղներ կախելը, որը ոչ
միայն արտայայտում է տոնի Ծառզարդար անուանումը, այլեւ աղերսներ
ունի պտղաբերության պաշտամունքի հետ (պտուղներ կախելը):
Մաղաքիա արք. Օրմանյանի վկայութեամբ, «Այդ անունով
(Ծաղկազարդ) կոչում ենք Քրիստոսի Երուսաղեմ գալու տոնը, որը
Զատկից մի շաբաթ առաջ է կատարւում, սակայն ոչ աւետարանական
պատմութեան, ոչ աւանդական հիշատակության եւ ոչ էլ օրուայ
արարողութեան մէջ ծաղկի խօսք չկայ: Ուրիշ ազգերի մէջ էլ այդ իմաստով
բան չկայ, հետեւաբար, Ծաղկազարդ անունը զուտ հայերէն լինելով,
տօնական կամ քրիստոնեական ծագում էլ չունի: Իրաւացի կլինի
ենթադրել, թէ Ծաղկազարդը Վարդավառ անուան նման հին ու հեթանոսական
տոն է հայերի մօտ, որը ժամանակների եւ պարագաների նմանութեամբ
Երուսաղեմ գալու տոնին խառնուեց եւ մէկի անունը միւսին տրուեց»:
Ծաղկազարդը նաեւ երիտասարդության տոն է: Այդ մասին վկայում են
տոնին կատարւող սովորութիւնները: Այդ օրն աղջիկներն ու տղաները
հագնում էին իրենց ամենագեղեցիկ ու թանկարժեք զգեստները, աղջիկները
նաեւ եղունգները հինա էին դնում: Նշանված տղաները արմատախիլ էին
անում մատաղ ուռենին եւ ճիւղերը զարդարում գույնզգույն լաթի
կտորներով, թելի վրայ շարված չամչահատիկներով, մրգերով եւ եռասայր
մոմերով:
Մինչեւ կէսգիշեր երիտասարդները Եկեղեցի էին շտապում: Առաջինը
տեղ հասնողը խփում էր զանգը, միւսները գնում էին քահանային
արթնացնելու: Նշանված տղաները զարդարված ծառերով կանգնում էին
իրենց հարսնացուների առաջ: Մերձաւոր կանանցից մէկը ծառի վրայ մի
եռասայր մոմ էր վառում ու ընծաներ տալիս նշանվածներին:
Ժամերգութիւնը ձգւում էր գրեթէ մինչեւ լուսաբաց, խլանալով
չըխկչըխկանների աղմուկով, որ երեխաները պատրաստում էին յատկապէս
այդ օրուայ համար: Առաւօտեան, ծառերն օրհնելուց յետոյ, ժողովուրդը`
գերազանցապէս երիտասարդներ, ծառերից մէկական ճյուղ պոկելով, տուն
էին տանում, այն տնկում հողի մէջ, որ արմատ տայ, կամ կախում էին
խնոցուց: Այն գցում էին նաեւ կրակը, որպէսզի կաթը եռացնելիս
չմակարդվի:
Այդ գիշեր, յաճախ, նախնական համաձայնութեամբ, նոր զույգերի
նշանադրություն էր կատարւում: Եկեղեցում տղայի մայրը ընտրած աղջկա
մատին մատանի էր դնում, գլխին` գլխաշոր գցում, որից յետոյ վերջինս
նշանված էր համարւում: Այս սովորություններն, անշուշտ, կապ ունէին
տոնի խորհրդի ու իմաստի հետ. այլաբանորեն այդ բոլորը առնչւում էին
բնութեան ծաղկումի, արգասավորման հետ` կատարվելով յատկապէս
գարնանը:
Տոնի օրը պատանիները ճըռճըռան ու կարկաչա հարելով, երգելով
ման էին գալիս տնետուն եւ Զատկի համար ձու հաւաքում: Լեռնային
Ղարաբաղի որոշ գիւղերում կանայք մոմերով գնում էին գերեզմանատուն
եւ այրուող մոմերն ամրացնում իրենց հանգուցեալների
գերեզմանաքարերին. ողջ գերեզմանոցը փայլփլում էր կրակներից:
Ծաղկազարդին, չնայած պաս էր, պատրաստւում էին անուշեղեններ`
նազուկ, փախլավա, ուրիշ թխվածքներ ու համեղ կերակուրներ:
Արտակ արք. Մանուկեանը ցավով նկատում է, որ «Ծաղկազարդի
տոնակատւսրութեան հին սովորոյթները, տոնախմբութիւնները, յատկապէս
գարնանային եղանակի պաշտամունքը, դարերի ընթացքին մոռացվեցին, եւ
այժմ այդ բոլորից մնաց միայն գեղեցիկ բառը` Ծաղկազարդ, որպէս
բացահայտիչ հին-հին տոնախմբութիւնների»:
Մարտի 28-ին Հայ Առաքելական եկեղեցին նշելու է Ծաղկազարդը,
որը խորհրդանշում է Յիսուս Քրիստոսի յաղթական մուտքը Երուսաղեմ:
Գարեգին Բ Ամենայն Հայոց Կաթողիկոսը Ծաղկազարդը հռչակել է
որպէս մանուկների օրհնութեան օր` նկատի ունենաով այն հանգամանքը,
որ Տիրոջ` Երուսաղեմի տաճար մտնելու ժամանակ մանուկներն աղաղակում
էին` ասելով. «Օրհնություն Դաւթի որդուն»: Իսկ ընդհանրապես Յիսուսի
մուտքը Երուսաղեմ ժողովուրդն ընդունել է խանդավառութեամբ` ձիթենու
եւ արմաւենու ճիւղերը, ինչպէս նաեւ իրենց զգեստները փռելով
ճանապարհի վրայ: Համաձայն եկեղեցու հայրերի ուսուցումների` Յիսուսի
առջեւ հանդերձներ նետելը խորհրդանշել է մեղքերից ազատուելը: Ոստեր
եւ ճյուղեր ընծայելը խորհրդանշել է առանձնակի պատիվներ եւ
հանդիսաւորութիւն: Ձիթենին համարուել է իմաստության, խաղաղութեան,
յաղթանակի եւ փառքի խորհրդանշան:
Ծաղկազարդի նախօրէին` շաբաթ օրը, կատարւում է Ծաղկազարդի
նախատոնակը, բացւում է խորանի վարագոյրը, իսկ յաջորդ օրը`
ժամերգությունից յետոյ, բաց վարագույրով մատուցվում է Ս. Պատարագ:
Ծաղկազարդի առաւօտեան եկեղեցում օրհնում են ձիթենու կամ ուռենու
ոստերը եւ բաժանում ժողովրդին:
«Ուռենու ոստերը, որոնք անպտուղ են, խորհրդանշում են
հեթանոսներին եւ պտղաբերեցին միայն Քրիստոսին ընծայվելուց յետոյ:
Ոստերի փափկությունը խորհրդանշում է Քրիստոսին հետեւողների
խոնարհությունը: Ուռենու ճիւղերը մեր ընծաներն են Տիրոջը, ինչպէս
Ծննդեան օրը մոգերի բերած ընծաները: Յիսուս Քրիստոսին ճանաչում ենք
որպէս Թագավոր` յաղթական պսակը գլխին, անեծքը վերացնող եւ
կենդանութիւն պարգեւող»,- ասուած է Արարատեան Հայրապետական
թեմի մամլոյ դիւանի հաղորդագրութեան մէջ:
Ծաղկազարդի օրը սովորաբար եկեղեցիներում մանուկների
օրհնութեան կարգ է կատարւում: