Արարատ Ղուկասեանի թեկնածութիւնը Իսպանիայում ներկայացուել է
«Բարեգործութիւն-2009» մրցոյթին
16-02-2010 18:00:00 | | Հասարակութիւն
ՎԱԼԵՆՍԻԱ, 16 ՓԵՏՐՈՒԱՐԻ, ՆՈՅԵԱՆ ՏԱՊԱՆ-ՀԱՅԵՐՆ ԱՅՍՕՐ: Իսպանիայի
«Արարատ» միութեան նախագահ, «Հայրենիք» շաբաթաթերթի հիմնադիր
խմբագիր Արարատ Ղուկասեանը ի թիւս այլ 10 անձանց մասնակցել է
Կատալոնիայի Մարդու իրաւունքների իստիտուտի կողմից յայտարարուած
«Բարեգործութիւն-2009» անուանումով մրցոյթին: Ինչպէս տեղեկացրեցին
«Արարատ» միութիւնից, ամենամեայ այս մրցոյթի նպատակն է այս
դժուարին ճգնաժամային տարիներին ակտիւացնել, իսկ որոշ դէպքերում
նաեւ յիշեցնել բարեգործութեան եւ հասարակութեան համար դրա կարեւոր
դերի մասին:
Որպէս «Բարեգործութիւն» մրցոյթի արժանի մասնակից Արարատ
Ղուկասեանի թեկնածությունն էին առաջարկել Միսլատայի եւ Վինալեսայի
քաղաքապետարանները, որոնց հետ «Արարատ» միութեան շրջանակներում
Ա.Ղուկասեանը բազմաթիւ բարեգործական, գաղթականների
սոցիալ-տնտեսական վիճակի բերալավման, նրանց ինտեգրման եւ
համակեցությանն ուղղուած միջոցառումներ է իրականացրել, նպաստել
հայկական մշակոյթի ներկայացմանն ու զարգացմանը: Մրցոյթին
ներկայացուել էին նաեւ Ա.Ղուկասեանի ծաւալուն գործունէութեան մասին
պատմող նիւթերը:
«Բարեգործութիւն-2009» մրցանակը շնորհուեց իսպանական յայտնի
լրագրող Խոսե Յոլդինին` 16 տարիների ընթացքում կատարած բարեգործական
աշխատանքի համար:
Մրցանականբաշխությունը տեղի ունեցաւ փետրուարի 9-ին
Կատալոնիայի խորհրդարանում: Միջոցառմանը «Արարատ» միութեան կողմից
ներկայ էին Անի Խաչատրեանը, Ռոբերտ Թավաքալյանը եւ Արթուր
Ներսիսեանը: