ԵՐԵՎԱՆ, 10 ՓԵՏՐՈՒԱՐԻ, ՆՈՅԵԱՆ ՏԱՊԱՆ: Փետրուարի 10-ին Հայաստանի
Գիտութիւնների Ազգային Ակադեմիայում տեղի է ունեցել «Գիտութեան
աշխարհում» գիտահանրամատչելի հանդէսի հիմնադրման հնգամյակին
նուիրուած հանդիսութիւն, որին մասնակցել է ՀՀ սփիւռքի նախարար
Հրանուշ Յակոբեանը:
ՀՀ ԳԱԱ նախագահ Ռադիկ Մարտիրոսեանը համառոտ ներկայացրել է
ամսագրի անցած ուղին` բարձր գնահատելով բազմաբովանդակ եւ որակական
բոլոր չափանաիշները բաւարարող պարբերականի հրատարակումը:
Այնուհետեւ «Գիտութեան աշխարհում» հանդէսի գլխաւոր խմբագիր,
ակադեմիկես Էդուարդ Ղազարեանը մանրամասն ներկայացրել է ամսագրի
հիմնական նպատակները եւ խնդիրները` ընդգծելով պարբերականի
գիտահանրամատչելի բնոյթը: Նա անդրադարձել է նաեւ Սփիւռքում
ամսագրի տարածման դժուարութիւններին` հոյս յայտնելով այդ հարցում
ստանալ Սփիւռքի նախարարութեան աջակցութիւնը:
Ըստ ՀՀ Սփիւռքի նախարարութեան Մամուլի եւ հասարակայնութեան
հետ կապերի վարչութեան հաղորդագրութեան, Հ.Հակոբեանն իր
գոհունակութիւնն է յայտնել Հայաստանում նման ամսագրի լոյս
ընծայման առթիւ: Նա յատկապէս շեշտել է այն մեծ մտաւոր աշխատանքը,
որը թաքնված է իւրաքանչիւր աշխատութեան, գրքի կամ ամսագրի
ստեղծման հիմքում: Հ.Յակոբեանը կարեւորել է նաեւ ամսագրի
արդիականութեան հարցը` նշելով դրա գրաւիչ, հետաքրքիր, մատչելի
լինելը, միեւնոյն ժամանակ գիտական բարձր արժէք ունենալու փաստը:
Նախարարը բարի երթ է մաղթել ամսագրին «սփիւռքեան ճամփեքով»`
հավաստելով իր պատրաստակամութիւնը աջակցելու այդ ազգանուէր
գործում: